VOV4.Jarai-Lơ 24/8, Gơnong bruă ia jrao tơring čar Dak Lak čih pioh dơ̆ng hơmâo 1 čô mơnuih djai yua Covid 19. Anai lĕ pô djai tal 4 ƀă klin Covid 19 amăng tơring čar Dak Lak. Pô djai anai hơmâo anăn gru mrô 161.832, tơkeng thun 1989, dŏ pơ sang mrô 54 jơlan Ama Jhao, Ƀuôn Păl Lăm, phường Tân Lập, plơi prong Ƀuôn Ma Thuột, Dak Lak.

Pô ruă tal 161.832 anai hơmâo tơlơi ruă mơ̆ng anet ƀu suăng ôh, mơnuih hưt laih anun hwing, ñu ƀă kman Sars-cov-2 lơ 2/8 laih anun arăng ba nao pơ sang ia jrao tơhan jăng jai mrô 1 pioh pơjrao. Lơ 3/8 arăng ba nao pơ sang ia jrao prong pơjrao tơlơi ruă pơtŭk hơngơ̆t hăng ruă kơsô̆. Truh lơ 15/8, ñu ruă kraih tui, arăng ba nao pơjrao pơ sang ia jrao prong kual Dap Kơdư brơi pơjrao.

Tơdơi 9 hrơi pơjrao, truh 4 mông 15 mơnit tlam lơ 23/8, mơnuih ruă tal 161.832 anai djai yơh. Sang ia jrao prong kual Dap Kơdư ngă hră pơar brơi pruih ia jrao pơdjai kman hlâo kơ ba nao pơyua atâo kiăng ngă djơ̆ hăng tơlơi pơtrun pơgang klin khut khăt.

Nay Jek: Pơblang