VOV4.Jarai - Jơnum min mơnuih ƀon sang tơring čar Dak Lăk phrâo ngă hră pơčrâo trun hăng 9 grup bruă yôm phun pioh ngă amăng thun hrăm 2021-2022. Tui anun, rơngiao kơ čih pơkra hăng pok pơhai akŏ bruă thun hrăm 2021-2022 hơdeč, lăp djơ̆ hăng hrơi mông hơmâo klin Covid-19, hơdôm boh sang hră kiăng lăng glăi, pơkrem, lui hĭ yua prăk amăng bruă ƀu kiăng đơi đah mơng dưi ngă bruă hơđong, ƀu pơđĭ prăk apah hrăm hră pơhmu hăng thun hrăm 2021-2022; hơmâo hơdră djru, lui hĭ mă prăk, ƀudah mă prăk aset ƀiă, pơkă sui ƀiă brơi mă prăk, djru ba hơdrôm hră hrăm kơ ƀing čơđai sang anŏ tơnap; khut khăt ƀu brơi hơmâo pô hlơi mă prăk ƀing čơđai rơgao hnong pơkă amăng thun hrăm phrâo.

Khua Gơnong bruă pơtô pơjuăt Dak lăk juh alum ƀing čơđai hăng nai pơtô

Hăng hơdôm kual tơnap, kual čư̆ siăng ƀu dưi hrăm amăng plang internet, sang hră hơmâo pơhiăp tom sang anŏ ƀing čơđai brơi čơđai hrăm kiăo tui lu hơdră phara đah mơng dưi hrăm giong kiăo tui akŏ bruă, pơhlôm pơtô klă mơn; ƀu brơi pơtô lăng amăng tivi ôh hăng anih muai; pơƀut ngă hrŏm, pơtô ba, djru ba amĭ ama rông ană bă, pơtô ba ƀing čơđai pơ sang hluai tui hơdôm glông pơtruh nao rai phara.

Siu H’Mai: Pơblang