VOV4.Jarai-Ƀrô djơ̆ čơkă blan bơrơmi ria têt trung thu, Gơnong bruă Bruă mă Tơhan rơka hăng Mơnuih mơnam tơring čar Dak Lak ngă hrom anom bruă tơdăm dra mut phung tơring čar laih anun Jơnum min mơnuih ƀôn sang tơring glông Krông Bông pơphun hơdră anăn trung thu kơ čơđai muai să Čư̆ Pui, tơring glông Krông Bông.

Brơi rơdêh tang rơwang kơ čơđai muai tơnap tap

Hăng akŏ bruă kah pơpha djru hrom čơđai muai, gum tơngan ngă bruă kiăng găn rơgao tơlơi truh klin kheng, amăng hơdră anai hơmâo ƀơk 200 anung gơnam, 5 boh rơdêh tang rơwang, 5 boh sưng kơƀang hrăm hră, 35 anung prăk hrăm hră, nua 1 klăk prăk sa anung hăng 8 anung prăk hrăm hră pơtrut pran jua amăng 1 thun hrăm hră, rơnoh prăk djru 300 rơbâo prăk sa blan sa čô čơđai muai ƀun rin ƀơi hơdôm să amăng tơring glông Krông Bông.

Kiăng pơgang hơđong hŭi klin kheng, hơdôm čô čơđai kơnong brơi pô pơ ala nao tŭ mă gơnam djru hăng prăk hrăm hră ƀơi mông jơnum pơdah hơdră anai, hơdôm dŏ glăi yua khua mua kual plơi pla ba nao tơl sang kơ čơđai muai hơmâo anăn tŭ mă gơnam djru.

Nay Jek: Pơblang