VOV4.Jarai - Kiăng juh alum pran jua ƀing čơđai muai glăk pơjrao tơlơi ruă hăng dŏ pơčlah yua klin Covid-19 ngă, tom brơi lơ 17/9, Grup wai lăng bruă čơđai muai tơring čar Dak Lăk hăng Sang gru grua hlăk ai čơđai muai tơring čar ngă hrŏm hăng anom bruă djru pơphun jơlan hơdră “Apui kơđen dian tŭi rơđah tơlơi kiăng khăp” Bơyan ngui blan Bơrơmi 2021. Tui anun, grup hơmâo nao čuă hăng brơi 200 anung gơnam kơ ƀing čơđai ƀơi 4 anih kah hăng: Sang ia jrao tơhan pơdong jăng ai mrô 1 hăng Anih pơčlah mơnuih mơnam Sang hră Cao đẳng Công nghệ Tây Nguyên ƀơi plơi prong Buôn Ma Thuột, Anih pơčlah mơnuih mơnam hăng ƀuôn Pưk Prong, să Ea Ning, tơring glông Čư̆ Kuin; hăng Anih pơčlah mơnuih mơnam ƀơi să Čư̆ Né, tơring glông Krông Ƀuk. Rim anung gơnam hơmâo ƀañ blan bơrơmi, ia tơsâo rơmô, apui kơđen dian kiăng ƀing čơđai čơkă Hrơi ngui ngor blan bơrơmi mơ-ak hloh. Prăk pioh ngă jơlan hơdră anai lĕ 30 klăk prăk.

Siu H’Mai: Pơblang