VOV4.Jarai-Jơnum lok 2 khua mua pơ ala mơnuih ƀôn sang tơring čar Dak Lak tal X, rơwang bruă thun 2021-2026 pơphun amăng dua hrơi, lơ 12 hăng lơ 13/8. Jơnum anai pơphun amăng mông klin Covid 19 ƀă hyu tơnap tap biă mă, jơnum lăng nao rai amăng tivi hăng 8 bit anih jơnum mơ̆ng ataih, kiăng pơhlôm tơlơi rơnuk rơnua hŭi ƀă klin kheng.

Ƀơi mông jơnum anai, khua mua pơ ala mơnuih ƀôn sang tơring čar Dak Lak pơtong glăi boh tơhnal ngă tui akŏ bruă pơđĭ kyar bơwih ƀong huă mơnuih mơnam, pơgang lŏn ia, hơđong dêh čar 6 blan akŏ thun; pơčrông sai bruă mă, hơdră či pơsir amăng 6 blan rơnuč thun 2021. 6 blan rơgao, mah bơbeč yua klin Covid 19 ngă, samơ̆ hăng tơlơi pơtum mă bruă, git gai ngă tui dua bruă pơtrun, pơhlôm pơgang klin rah hăng pơtrut tơlơi bơwih ƀong huă rah, rơnoh prăk pơhrui glăi jia amăng tơring čar pơkă hăng thun 2010 ăt dưi ngă djop rơbêh 22.200 klai, đĭ tui rơbêh 9,11%.

Prăk pơhrui glăi kơ keh prăk kơnuk kơna truh 3.595 klai prăk, đĭ tui 11,5% pơkă hăng tal anai mơ̆n thun hlâo; bruă mă gru grua thâo thăi-mơnuih mơnam ăt djă bong hơđong kjăp; hơdôm jơlan hơdră tơlơi djru kơ mơnuih mơnam bơwih ƀong huă dưi gleng nao djop, tơlơi hơdip mơda mơnuih ƀôn sang pơgang djop.

Ƀơi mông jơnum, ƀing khua mua djru pơgôp hiăp hơdôm hơdră či pơsir amăng hơdôm blan dŏ glăi thun 2021; pơčrông sai ngă hră pơtrun akŏ bruă pơđĭ kyar bơwih ƀong huă mơnuih mơnam tơring čar 5 thun pơ anăp. Abih bang ƀơi 8 bit anih jơnum mah pơdah lăng ƀô̆ mơta mơ̆ng ataih hai, hlâo kơ mut jơnum ƀing khua mua pơ ala mơnuih ƀôn sang tơring čar Dak Lak tal X arăng khom mă ia khak ba pơčrang hmar ĕp kman sars-cov2 soh, laih anun brơi dŏ ataih nao rai tơdruă djơ̆ tơlơi pơkă.

Nay Jek: Pơblang