VOV4.Jarai-Hơdôm tơring čar kual Dap Kơdư lăi hrom, Dak Lak hnun mơ̆n truh bơyan hơjan laih. Samơ̆ ƀơi să Êa Siêng, plơi prong Ƀuôn Hô, tơring čar Dak Lak ăt aka ƀu hơmâo hơjan mơ̆n, ring bruă bơnư̆ kong ia thu abih ngă kơ 2000 ha đang hmua phun pla bơbeč sat hăng 1.400 boh sang anŏ mơnuih ƀôn sang kơƀah ia yua.

Tui hăng tơlơi jŭ yap mơ̆ng Jơnum min mơnuih ƀôn sang să Ea Siêng brơi ƀuh, bơyan hmua puih phang thun 2021, đơ đam să hơmâo 2000 ha phun pla, amăng anun 1.500 ha phun kyâo boh troh sui thun kah hăng kơphê, tiu, makka, boh jrang yuan, dŏ glăi 500 ha phun pla ƀiă blan kah hăng pơdai, kơtor, rơtă rơbai bơbeč yua soh.

Tui hăng Jơnum min mơnuih ƀôn sang să Ea Siêng, tơlơi adai không phang khôt djơh hăng anai hơmâo na nao rĭm thun, biă mă ñu bơyan phang. Khă tui anun, bơyan hơjan kah hăng ră anai, aka ƀu ƀuh đơi ôh phang khôt kơtang biă mă. Phang khôt ƀu kơnong ngă kơ 2000 ha phun pla djai krô đôč ôh, dŏ hơmâo 7.500 čô mơnuih ƀôn sang amăng să kƀah ia yua kơtang biă mă.

Nay Jek: Pơblang