VOV4.Jarai - Gơnong bruă hmua hăng pơdĭ kyar plơi pla tơring čar Dak Lăk hơmâo pơphun Jơnum klah čun thun 2021, pok pơhai bruă mă amăng thun 2022. Tui hăng tơlơi lăi pơthâo ƀơi mông jơnum, thun 2021, mah dŏ bưp tơnap tap yua klin Covid-19 ngă, ăt hơmâo klin klon ƀơi hlô rông, nua gơnam mơng hmua ăt trun mơn, samơ̆ rơnoh pơkă amăng bruă hmua lêng dưi ngă hăng yak pơgao akŏ bruă jao.

Amăng anun, nua gơnam mơng hmua, mơng glai, akan hơdang đĭ giăm 4% pơhmu hăng thun 2020; pla glai hơmâo rơbêh 146% akŏ bruă; klin kman ƀơi phun pla, hlô rông dưi mơn pơgang hĭ, mrô să plơi pla phrâo hơmâo rơbêh 46%. Hơdôm tơlơi dưi ngă anai gum pơđĭ tui rơnoh đĭ kyar bơwih ƀong huă - mơnuih mơnam hrŏm mơng tơring čar. Tui hăng Gơnong bruă hmua hăng pơđĭ kyar plơi pla tơring čar, thun 2022 Dak Lăk gir pơtrut pơplih djuai phun pla, ba tơbiă bruă kiăng ngă hăng khŏm dưi ngă rơnoh đĭ kyar 4,56%.

Siu H’Mai: Pơblang