VOV4.Jarai - Dăk Lăk kiăng pơđĭ tui anih pioh pơplông amăng tal pơplông abih anih 12 thun 2021, anai lĕ tơlơi kiăng mơng Kơ-iăng khua ding jum pơtô hăng pơjuăt bruă ơi Nguyễn Văn Phúc ƀơi mông ngă bruă hăng Anom git gai pơplông abih anih 12 thun 2021 tơring čar Dăk Lăk kơ bruă prăp lui hrơi pơplông, hơmâo jơnum amăng tlam lơ 2/7. Grup hơmâo sem lăng kual in tơlơi pơplông, anih ngă phách, čom puang hăng anih anom ƀơi sa dua anih pơplông. Amăng anun, pơƀut pel ĕp ƀơi hơdôm anih hơmâo lu čơđai hrăm giong mơng thun hlâo nao pơplông glăi. Amăng mông klin Covid-19 glăk tơnap tui anai, Kơ-iăng khua Ding jum pơtô hăng pơjuăt bruă Nguyễn Văn Phúc pơtă pơtăn hrŏm hăng pơhlôm hrơi pơplông klă, djơ̆ tơlơi phiăn, tơring čar Dăk Lăk ăt kiăng lăng ba hloh mơn bruă pơhlôm rơnuk rơnua pơgang klin kơ ƀing nai, mơnuih wai lăng amăng hrơi pơplông hăng ƀing čơđai nao pơplông. Tơring čar dăp hơmâo 32 anih pơplông hăng rơbêh 840 boh sang hră. Rơbêh 2.700 čô nai pơtô, mơnuih mă bruă gah bruă pơtô hrăm, kông ang, ia jrao...hơmâo iâu nao gum djru lăng ƀing čơđai pơplông, pơhlôm rơnuk rơnua hơđong.

Siu H’Mai: Pơblang