VOV4.Jarai - Tơlơi lăi glăi mơng Gơnong bruă ia jrao Dak Lăk tlam lơ 26/10 brơi thâo, anom bruă ia jrao glăk bưp tơnap tap amăng bruă blơi ia jrao hăng măi djru khăm pơjrao tơlơi ruă, biă ñu hăng ƀing ƀă kman SARS-CoV-2. Hơmâo tơlơi anai lĕ yua lu anom bơwih ƀong gah ia jrao ƀu dưi mơ-it hră pơ-ar hơduah blơi yua dah sang dăng kông ƀu ngă bruă, rơdêh ƀu pơđuăi, lu kông ti gơgrong blơi gơnam yua gah ia jrao dŏ ƀơi anih arăng kŏm tơbiă hyu, anih pơčlah yua hnun ƀu dưi mơit hră rơkâo blơi.

Ƀơi anăp tơlơi anai, Gơnong bruă ia jrao tơring čar Dak Lăk ngă hră rơkâo Jơnum min mơnuih ƀon sang tơring čar Dak Lăk rơkâo kơ Ding jum ia jrao, Kơnuk kơna djru ba, kah pơpha ia jrao, gơnam yua gah ia jrao tañ kơ tơring čar đah mơng pơjrao brơi mơnuih ruă. Bơdjơ̆ nao klin Covid-19 ƀơi Dak Lăk, yap mơng 4 mông tlam lơ 25/10 truh 4 mông tlam lơ 26/10, tơring čar čih pioh hơmâo 150 čô mơnuih ƀă kman Sars-CoV-2. Plơi prong Buôn Ma Thuột lĕ anih hơmâo lu mơnuih ƀă kman amăng kual plơi pla.

Siu H’Mai: Pơblang