VOV4.Jarai-Kiăng djru ba mơnuih ƀôn sang tơnap tap yua bơbeč djơ̆ mơ̆ng klin Covid 19, hơdôm hrơi rơgao, lu anom bruă hăng khul mơnuih mơnam mut phung ƀơi tơring čar Dak Lak hơmâo pok pơhai hơdră djru čơgăn pơdă gơnam sĭ mơdrô brơi soh sel. Amăng hrơi blan hơmâo klin kheng hơđuh rai kơtang, lu mơta gơnam sĭ mơdrô djru brơi soh sel, kiăng brơi kơ mơnuih tơnap tap hơmâo hmăi mơnong ƀong huă rĭm hrơi jăng jai ƀu thâo tơbiă hyu yua klin kheng ngă.

Tơdơi kơ nao ĕp lăng djop mơta gơnam sĭ mơdrô ƀu mă prăk, yă Đoàn Thị Xuân Đào, dŏ pơ grup mrô 2, phường Tân Lợi, plơi prong Ƀuôn Ma Thuôt, tơring čar Dak Lak hơmâo tŭ mă hơdôm gơnam sang anŏ či kiăng biă mă, kah hăng braih, hra ƀong, tơpung mih ƀôt ngot, sik, ia mơsin, ia rơmă, anăm ƀuăt hăng hơdôm mơta añăm pơtam asăt hơbơi pioh hơtŭk añăm. Yă Đào brơi thâo, sang anŏ ñu hơmâo anăn sang anŏ ƀun rin, rơkơi rơngiă laih yua tơlơi ruă ƀu thâo pơjrao, hơjăn ñu rông dua čô ană anet nao sang hră tơlơi hơdip tơnap tap biă mă. Kiăng hơmâo mơnong ƀong huă rĭm hrơi, khom ngă bruă sĭ mơdrô anet pơ sang čơ samơ̆ rơbêh ha blan anai, khom pơdơi hĭ yua pơgang klin. Lơ̆m ƀuh arăng ƀơk pơpha hră rai tŭ mă gơnam sĭ mơdrô ƀu mă prăk ôh, gơñu mơak biă mă yơh:

“Kâo bơni biă mă kơ hơdră anai hơmâo djru kơ gơmơi amăng mông klin kheng anai yua ƀu thâo hyu mă bruă tơpư̆ ƀong, ƀu hơmâo prăk kăk anun yơh hơmâo hơdră anai djru gơmơi sa črăn kiăng găn rơgao hĭ tơlơi tơnap amăng tơlơi hơdip mơda”.

Mơnuih ƀôn sang ruah mă gơnam či kiăng ƀơi siêu thị 0 prăk

Anih sĭ mơdrô yero (0) prăk jing ƀu mă prăk ôh yua kơ anom bruă khua hlăk ai tơring čar Dak Lak pơphun, laih anun Khul đah kơmơi mut phung tơring čar ngă hrom kông ty pơčruh ngăn sĭ mơdrô prăk mah pơtâo priă Phú Nhuận PNJ ƀơi kual Dap Kơdư –Nam Trung ngă hrom lu sang bruă pơkŏn djru, kiăng gum ba mơnuih ƀôn sang ƀun rin, tơnap tap amăng mông ƀu thâo bơwih ƀong yua pơgang klin. Anih sĭ mơdrô ƀu mă prăk hơmâo giăm 40 mơtam gơnam sĭ mơdrô mơnong ƀong huă, braih apiăng, añam pơtam boh troh hơbơi pơtơi.

Lăng nao hră čih anăn rơkâo mơ̆ng djop plơi pla lăi pơthâo, să pơtruh brơi hăng khua mua plơi prong Ƀuôn Ma Thuôt, khul khua mua pơphun tơlơi djru ngă brơi 500 pok hră tơlơi khăp, ƀơk kơ hơdôm sang anŏ tơnap tap, sa pok hră dưm dưm hăng 300 rơbâo prăk.

Yap mơ̆ng lơ 14-17/8, mơ̆ng 7 mông mơguah truh 5 mông tlam, mơnuih ƀôn sang hơmâo hră anai, nao tŭ mă gơnam ƀong huă djop rơnoh prăk arăng djru anun, ruah mă gơnam hơgĕt ta kiăng pioh ba glăi pơjing mơnong ƀong huă. Ayong Võ Chí Nhân, Khua wai lăng Marketing, kông ty pơčruh ngăn Prăk mah pơtâo priă Phú Nhuận PNJ pơ kual Dap Kơdư-Nam Trung brơi thâo, khul khua mua hơmâo brơi mă yua 180 klăk prăk pioh djru kơ mơnuih ƀôn sang ƀun rin nao tŭ mă gơnam pơ anih sĭ mơdrô siêu thị ƀu mă prăk ôh, rơnoh sĭ mơdrô hơmâo pơthâo brơi rơđah rơđong laih ƀu mă prăk ôh.

Hlăk ai mut phung djru mơnuih ƀu klă drơi jăn ruah gơnam djru ƀơi siêu thị 0 prăk

Mơnuih ƀôn sang hơmâo hră ruah mă gơnam gơñu kiăng samơ̆ djop 300 rơbâo prăk, ba glăi yơh, djơ̆ hăng rơnoh prăk amăng hră arăng djru. Laih dơ̆ng, gơñu dưi ruah hơgĕt añăm kiăng tŭ mă, djop mơta, tŭ kơ djop rơnoh prăk arăng brơi:

"Hơdôm mơta gơnam amăng siêu thị djop yơh, hlơi kiăng hơgĕt ruah mă mơnong ƀong huă anun ba glăi, ta ƀu ngă anung brơi mơtam ôh, sa anung 300 rơbâo prăk thơ, samơ̆ brơi arăng mă hơgĕt gơnam arăng kiăng tŭ kơ djop 300 rơbâo prăk, ăt kah hăng gơñu ruah mă gơnam amăng siêu thị tơđar mơ̆n. Hăng lu mơnuih hră rơnoh 300 rơbâo prăk lăng ƀiă đôč samơ̆ gơñu rai pơ siêu thị tŭ mă gơnam sĭ mơdrô ƀu mă prăk anun jing pơmă hloh kơ 300 rơbâo prăk mơ̆n, yua kơ hơmâo tơlơi pơkă rơnoh mơ̆ng Metro laih anun Co.op, arăng sĭ brơi nua rơgêh, yua kơ anun blơi sĭ hăng nua rơgêh đôč”.

Tui hăng ayong Trần Doãn Tới, Kơ-iăng Khua git gai hlăk ai tơring čar Dak Lak, hrom sang siêu thị anet mnini ƀu mă prăk ôh, hrơi blan rơgao, hlăk ai tơring čar Dak Lak hơmâo pok pơhai lu hơdră tui bruă djru hăng rơnoh yero prăk dưm ƀơi siêu thị ba hyu, pơgiăng hăng rơdêh ƀơk gơnam sĭ mơdrô ƀu mă prăk,…kiăng djru kơ mơnuih ƀun rin tơnap tap hăng ƀing sang anŏ hơmâo mơnuih djơ̆ klin yua Covid 19 ngă.

Samơ̆ tui hăng hơdră iâu anăn phara djop hơdră ăt anăp nao kơ bruă djru mơnuih tơnap tap soh, kiăng mơnuih ƀôn sang hơmâo hmăi mơnong ƀong huă dưi rơgao hrơi lông lăng. Hrom hăng bruă pơphun dưm gơnam djru pioh  kơ mơnuih ƀôn sang nao tŭ mă lĕ, anom bruă hlăk ai tơring čar pơphun brơi hlăk ai pơgiăng hyu bă gơnam tơl sang djru mơnuih ƀôn sang ƀu dưi tơbiă pơ rơngiao, ƀing anai jing kah hăng ƀing shipper, ba gơnam sĭ mơdrô nao tơl sang, anih dŏ pơčlah mơnuih mơnam phara.

“Tơdơi kơ siêu thị 0 prăk ƀơi Ƀuôn Ma Thuôt lĕ gơmơi amra nao pơ lu anih pơkŏn dơ̆ng amăng tơring čar. Hăng ƀing tơnap tap, bơbeč yua mơ̆ng klin Covid 19 ƀu dưi nao tơl anih dưm siêu thị či mă gơnam lĕ, gơmơi pơphun brơi hlăk ai pơgiăng ba nao tơl sang kiăng djru mơnuih ƀôn sang hmao kru laih anun tŭ yua”.

Hrom hăng bruă djru mơnuih mă bruă ƀu hơđong, sang anŏ tơnap tap, ƀing tha rơma ƀu hơmâo pô lăng ba, ƀu hơmâo prăk kăk, dơ̆ng mơ̆ng lơ 8/8 phrâo rơgao, Jơnum min mơnuih ƀôn sang phường Thống Nhất, plơi prong Ƀuôn Ma Thuôt ăt pơphun hơdră siêu thị 0 prăk mơ̆n dưm ƀơi sang hră gưl sa Lê Hồng Phong. Rơngiao kơ hơdôm gơnam sĭ mơdrô mơnong ƀong huă rĭm hrơi hăng añăm pơtam hơbơi pơtơi, pơ anai arăng pơdă wơ̆t añăm mơnong, akan asăt. Truh ră anai, hơmâo 3 wơ̆t pơphun sĭ mơdrô hăng 900 anung gơnam djru soh sel đôč kơ mơnuih ƀôn sang ƀơi 9 boh să, phường plơi prong Ƀuôn Ma Thuôt.

Siêu thị 0 prăk phường Thống Nhất

Yă Trịnh Như Ngọc, Khua jơnum min mơnuih ƀôn sang phường Thống Nhất, plơi prong Ƀuôn Ma Thuôt, tơring čar Dak Lak brơi thâo, rĭm anung gơnam hơmâo combo pơkă rơnoh bơkơnar soh pioh mơnuih ƀôn sang ruah mă gơnam gơñu kiăng. Rơngiao kơ anun, mơnuih ƀôn sang ruah mă dơ̆ng hơdôm gơnam pơkŏn ƀơi siêu thị.

Dơ̆ng mơ̆ng pơphun ngă bruă, siêu thị 0 prăk hơmâo lu mơnuih djru hrom, anom bruă pơčruh prăk hăng 200 klăk prăk mơta laih anun 5 tơn añăm pơtam hơbơi pơtơi. Mơ̆ng gơnam djru anai, siêu thị amra djru na nao tơl abih hrơi pơčlah mơnuih mơnam tui hră pơčrâo mrô 15 mơ̆ng khua dêh čar:

"Hơmâo laih lu mơnuih čơmah djru hăng nao tơl sang kah pơpha gum ba mơnuih tơnap tap, yua kơ anun gơmơi đăo sit đăo kơnang kơ ƀing mơnuih čơmah djru ba mơnong ƀong huă, braih apiăng, añăm mơnong, akan asăt, prăk mơta pioh gơmơi dăp dơ̆ng hơdră djru anai klă hloh, ba nao truh pơ mơnuih tơnap tap gơnam ƀong huă djop ƀong huă rơgao hrơi. Gơmơi kiăng kah pơpha sa črăn djru tơlơi tơnap tap amăng mông anai, kơ mơnuih tơnap tap”.

Hăng bruă yôm djru ba sa čơpăt asơi mông rơpa brơi bơkơnar hăng anung lơ̆m prong lơ̆m kian trơi”, hơdôm anung gơnam anun mơ̆ng hơdră 0 prăk djru mơnuih ƀôn sang tơnap tap. Lu anung gơnam djru anai jai tŭ yua prong hloh, djru ba hmao kru hăng pơgang ư̆ rơpa kơ mơnuih hăng sang anŏ tơnap tap kiăng amăng mông klin kheng anai.

H’Xíu Hmŏk pô čih-Nay Jek:Pơblang