VOV4.Jarai - Lơ 19/5, Khul wai lăng grup čơđai muai tơring čar Dăk Lăk ngă hrŏm hăng Sang gru grua Hlăk ai čơđai anet pơphun mă yua Đang ngui ƀing  čơđai Dăk Lăk hăng bul pơtâo ia rơsĭ Dêh čar. Ring bruă hơmâo pơdong ƀơi Sang gru grua Hlăk ai čơđai anet tơring čar, hơmâo gru gong tơmeh anet čih pioh abih bang bul ia rơsĭ Trường Sa. Ƀơi sa gong tơmeh lêng čih rơđah anăn gong tơmeh, vĩ độ, kinh độ.

Ƀing khua phin rup ƀơi Đang ngui ƀing čơđai hăng bul pơtâo ia rơsĭ dêh čar ta.

Ring bruă hơmâo pơdong ƀơi Sang gru grua hlăk ai čơđai anet Dăk Lăk.

Tơdơi kơ ha blan pơphun ngă, hơmâo prăk djru mơng abih bang hăng tơlơi gum djru mơng ƀing čơđai tơring čar kiăo tui jơlan hơdră bruă ngă anet, ring bruă hơmâo ngă giong laih, prăk pioh pơkra lĕ 170 klăk prăk. Đang ngui ƀu kơnong ngă hơmâo anih hiam ƀơi Sang gru grua hlăk ai čơđai anet amăng tơring čar đôč ôh, anai jing hơbô̆ bruă pơtô ƀing čơđai hăng rup, dưi lăng ƀuh ƀơi mơta, mơng anun kiăng ƀing čơđai thâo hluh djŏp tơlơi hơmâo ƀơi ia rơsĭ, bul pơtâo ia rơsĭ, kual lŏn ia ta, pơđĭ tui tơlơi khăp kơ lŏn ia, pơđĭ tui tơlơi gơgrong bruă mơng ƀing čơđai amăng bruă pơđĭ kyar hăng pơgang ba Lŏn ia.

Siu H’Mai: Pơblang