VOV4.Jarai - Tlam lơ 18/10, ơi Lê Quang Bất, Khua Jơnum min mơnuih ƀon sang să Ea Tul, tơring glông Čư̆ M’gar (Dak Lăk) pơsit, ƀơi să hơmâo tơlơi truh ƀlung ia ngă 2 čô čơđai đah rơkơi djai. Dua čô djai lĕ nô Y Tiêm Mlô, 11 thun hăng Y Zeam Niê, 8 thun lêng dŏ ƀơi ƀuôn Tu, să Ea Tul, tơring Čư̆ M’gar. Dua čô anai glăk hrăm sang hră gưl sa Phan Chu Trinh, să Ea Tul, tơring glông Čư̆ M’gar, tơring čar Dak Lăk.

Pơ ala kơ Jơnum min mơnuih ƀon sang să Ea Tul, tơring glông Čư̆ M’gar nao čuă, juh alum, brơi gơnam djru kơ sang anŏ hơmâo mơnuih djai.

Ơi Lê Quang Bất lăi pơhmư̆, Y Tiêm hăng Y Zeam jak mă dua ñu nao ngui pơ Ea Tria, să Ea Tul, truh mot baih aka ƀu glăi pơ sang ôh. Lăng ană bă aka ƀu glăi, sang anŏ gơñu hyu ĕp ƀơi lu anih. Truh mơguah lơ 18/10, arăng ƀuh sum ao Y Tiên hăng Y Aeam hăng kơdư dơnao Ea Tria, yua hnun iâu arăng ñŭ mă. Tơdơi kơ 1 mông hyu ĕp, arăng ba đĭ dua čô anai hăng kơdư. Tơdơi kơ hơmâo tơlơi truh, gong gai nao juh alum, rơngôt tom sang anŏ, brơi gơnam djru ba sang anŏ prăp rơmet mơyut jôk kơ tơlơi djai rơngiă. Tơlơi truh djai ia ƀlung pap biă hăng ƀing čơđai anai ƀơi tơring čar kual dap Kơdư, jing tơlơi kiăng ƀing ta kơđiăng, hơdor lui, sang anŏ lăng ba hloh ană bă đah mơng huăi hơmâo tơlơi truh rơngôt tui anai.

Siu H’Mai: Pơblang