VOV4.Jarai - Jơnum min mơnuih ƀon sang tơring glông Ea Hleo, tơring čar Dak Lăk brơi thâo, Kơčăo bruă sang măi apui lơtrik pơkĕ mơng jua angin Ea Nam pơdong ƀơi tơring glông hơmâo pơkra giong laih, kơnong dŏ tơguăn pơkra ming kĭ thuâ̆t dong lĕ dưi mă yua laih. Anai ƀu kơnong jing kơčăo bruă pơkra apui lơtrik pơkra hăng kơdư pơkĕ mơng jua angin prong hloh amăng dêh čar ta, hơmâo pơkra tañ hloh đôč ôh mơ̆, ăt hơmâo jŭ yap dưm kơnar tơlơi gêh gal bơwih ƀong hăng mơnuih mơnam. Kơčăo bruă Sang măi apui lơtrik pơkĕ mơng jua angin Ea Nam yua Grup bơwih ƀong Trung Nam ngă pô tuh pơ plai, hơmâo 84 gŏng wơ̆t angin, 1,2 km hrĕ apui 50kv, prăk pioh pơkra 16.500 klai prăk, hơmâo ngă ƀơi 3boh să Ea Nam, Ea Khal hăng Dliê Yang tơring glông Ea H’Leo. Kơčăo bruă anai hơmâo pơsit tuh pơ alin amăng lơ 31/12/2020 laih anun hrơi mông pơkra lu hloh amăng mông hơmâo klin Covid-19. Khă hnun, hăng tơlơi gir run mơng pô tuh pơ alin, pô gơgrong pơkra hăng gong gai djŏp gưl tơring glông Ea H’leo hăng tơring čar Dak Lăk, kơčăo bruă hơmâo ngă giong mơ̆ huăi hơmâo tơlơi truh hơget ôh.

Ha bơnah mơng sang măi apui lơtrik pơkĕ hăng jua angin Ea Nam

Tui hăng tơlơi jŭ yap mơng pô tuh pơ alin, lơ̆m mă yua, Apui lơtrik pơkĕ mơng jua angin Ea Nam amra dưi pơkra rai rơbêh 1 klai 100 klăk kWh/thun. Tơdah anom bruă apui lơtrik blơi abih mrô anai, prăk pơhrui glăi 1 thun mơng kơčăo bruă amra hơmâo năng ai 94 klăk dolar Mi, pơgôp brơi prăk kăk amăng tơring čar hơmâo năng ai 250 klai prăk.

Siu H’Mai: Pơblang