VOV4.Jarai-Lơ 28/10, Grup hyu sem lăng mơ̆ng Ding jum Bruă mă Tơhan rơka hăng Mơnuih mơnam hơmâo mă bruă hăng Jơnum min mơnuih ƀôn sang tơring čar Dak Lak kơ bruă djru mơnuih ƀôn sang, sang bruă sĭ mơdrô, mơnuih mă bruă apah hăng mơnuih apah mă bruă hlăk bưp tơlơi tơnao tap yua klin Covid 19 ngă. Khua pơ ala gah anom bruă Bruă mă, Ding jum Bruă mă Tơhan rơka hăng Mơnuih mơnam lăi, lu tơlơi djru mơ̆ng kơnuk kơna ƀơi Dak Lak pok pơhai ngă tui dŏ kaih biă mă, ƀu hơmâo tơlơi hơdai gum hrom mă bruă.

Ơi Vũ Trọng Bình, Khua anom bruă Bruă mă, Ding jum Bruă mă Tơhan rơka hăng Mơnuih mơnam đĭ pơhiăp ƀơi mông mă bruă

Ngă tui Hră pơtrun 68 mơ̆ng Kơnuk kơna, yap truh lơ 26/10, tơring čar Dak Lak hơmâo pơsit laih brơi kơ 3000 čô mơnuih apah mă bruă, năng ai 55 rơbâo čô mơnuih mă bruă apah tŭ mă prăk djru abih tih 29 klai prăk. Mơ̆ng anun, ƀơk abih rơnoh prăk djru kơ mơnuih mă bruă apah, apah mă bruă năng ai 48 rơbâo čô mơnuih mă bruă apah tŭ mă 21 klai prăk.

Hơdôm khul mơnuih djru ƀơi tơring čar Dak Lak, ngă klă tơlơi anai, samơ̆ hơmâo mơ̆n hơdôm khul mơnuih jơlan hơdra djru aka pơsit giong ôh rơnoh prăk djru kah hăng djru ba mơnuih mă bruă apah ƀu hơmâo hră pơkôl mă bruă, pơsit rơbêh 9.400 čô mơnuih tŭ mă samơ̆ kiah djru 3000 čô mơnuih đôč, rơnoh prăk 3 klai 800 klăk prăk, mrô prăk hơmâo ƀơk kiah 35%; jơlan hơdră djru kơ mơnuih mă bruă apah tơnap tap jăng jai arăng brơi pơdơi mă bruă, tŭ mă tơlơi djru lĕ 357 čô, samơ̆ kiah djru 173 čô, dưi ngă 47%.

Grup hơmâo rơkâo tơring čar Dak Lak khom pơsir mơtam kiăng hmao djru ba mơnuih tơnap tap bơbeč yua mơ̆ng klin covid 19 ngă.

Nay Jek: Pơblang