VOV4.Jarai-Ƀơi anăp klin kheng ƀă hyu kơtang Covid 19, lơ̆m mrô mơnuih ƀă amăng kual plơi pla lu tui, tlam lơ 25/8, Jơnum min mơnuih ƀôn sang tơring čar Dak Lak hơmâo kĭ hră pơtrun mrô 8118 kơ bruă ngă tui tơlơi pơčrâo 16 mơ̆ng kơnuk kơna amăng plơi prong Ƀuôn Ma Thuôt hăng tơring glông Krông Ƀŭk mơ̆ng 6 mông tlam lơ 26/8 truh kơ hơmâo hră lăi pơthâo phrâo.

Anih pơgăn jơlan pơgang klin ƀơi să Čư̆ Êbur, plơi prong Ƀuôn Ma Thuôt

Tui hăng anun, Jơnum min mơnuih ƀôn sang tơring čar Dak Lak jao kơ Khua Jơnum min mơnuih ƀôn sang plơi prong Ƀuôn Ma Thuôt hăng tơring glông Krông Ƀŭk tui hluai tơlơi gêh găl pơsit mă ngă tui tơlơi pơtrun, phuă kjăp amăng bruă pơhlôm, pơgang klin tŭ yua hloh. Tŭ ư jao kơ Jơnum min mơnuih ƀôn sang Ƀuôn Ma Thuôt mă yua prăk kơnuk kơna djơ̆ găl pioh pok pơhai brơi mă ia khak ia mơdung djop mơnuih ƀôn sang laih anun ba pơčrang kman Sars-cov-2, kiăng thâo tong ten laih anun pơčlah mơtam ƀing F0 tơbiă mơ̆ng plơi pla sang anŏ.

Tal pơčlah hlâo kơ anai, plơi prong hơmâo čih hră pơpha nao sang čơ, bơblih nao rai kiăng pơtum lu mơnuih sa wơ̆t, laih dơ̆ng hruă kjăp hloh bruă pel ĕp, lăng tui pơgăn mơnuih ƀôn sang tơbiă pơ rơngiao ƀơi jơlan glông.

Nay Jek: Pơblang