VOV4.Jarai-Mơguah lơ 15/12, ƀơi plơi prong Ƀuôn Ma Thuôt, Jơnum min mơnuih ƀôn sang tơring čar Dak Lak hăng Anom bruă pơgang hlô mơnong amăng glai kual ASIA, jơnum kĭ hră ngă hrom pơblih hơdră ba tuai hyu ngui đĭ rơman jing bruă ngă lăng rơman hăng jĕ giăm mơak.

Tui hăng tơlơi kĭ pơkôl, tơring čar Dak Lak amra anăp nao kơ bruă mă pơgang djuai rơman klă hiam hloh: kah hăng ƀu pơphun dơ̆ng tah bruă tuai hyu đĭ rơman, pơplông rơman luai ia, lăng rơman čưng boh lông, rơman đuăi, rơman hwa kyâo, rơman rŭi hyu amăng jơlan kơsu, jơlan bêtông, ƀudah brơi đĭ rơman pơhrôp glăi bruă guăi rơman hăng pơsăng rơman.

Jơnum min mơnuih ƀôn sang tơring čar Dak Lak ăt ngă gêh găl kơ Anom bruă wai lăng hlô amăng glai kual ASIA jak iâu pơčruh prăk ƀơi tơring čar djơ̆ tơlơi phiăn pơkă, jao kơ Gơnong bruă Đang hmua hăng Pơđĭ kyar plơi pla tơring čar pô pơtruh nao rai ngă hrom hăng Anom bruă wai lăng hlô mơnong ASIA laih anun djop sang bruă ngă hrom sang anŏ mơnuih ƀôn sang hơmâo rơman, rông rơman pơkra hơdră wai lăng, pơgang rơman, brơi tuai hyu ngui ĕp lăng, jĕ giăm hăng rơman pơsit brơi akŏ bruă hlâo kơ ba ngă tui.

Nay Jek: Pơblang