VOV4.Jarai-Tơring čar Dak Lak ră anai hơmâo rơbêh 209 rơbâo hektar đang kơphê, hnong pĕ pơhrui glăi rĭm thun him lăng rơbêh 500 rơbâo tơn, mơnong hơmâo pơhrui prăk kơ hơdôm rơtuh rơbâo sang anŏ mơnuih ngă hmua. Kiăng pơgăn tơlơi dŏp pĕ kơphê, pơgang ba dram gơnam  mơnuih ƀôn sang ngă hmua pla kơphê, djop sang bruă hăng khua mua amăng plơi pla amăng tơring čar hlăk pok pơhai lu hơdră tui tơlơi thâo ngă bruă pơhlôm pơgang.

Lơ̆m 3 tlam amăng sa wơ̆t hrơi tơjuh, tơdơi kơ huă asơi añăm či tlam mơmŏt, ơi Trương Văn Đệ, thôn 3, să Ea Kpam, tơring glông Čư̆ Mgar, buh ao pơđao, čŭt tơkhŏ kơsu ủng hrôm tơkai, klum đuăn, djă apui pit...hrom hăng ƀing hlăk ai tơdăm amăng ding kơna grup wai lăng mă plơi pla, hyu tir yơh kiăng pơgang hmua đang kơphê kơ mơnuih ƀôn sang. Ơi Đệ lăi, hmua kơphê mơ̆ng sang anŏ ñu pơ rơnuč plơi thôn 3, ataih mơ̆ng plơi anun yơh hŭi biă arăng pĕ dŏp kơphê. Yua kơ anun, mơ̆ng akŏ blan 10, sit boh kơphê tha tui laih, khua mua git gai amăng plơi khom hyu tir, pơgang kơphê.

“Thun hlâo sang anŏ gơmơi ƀing mơnuih sat nao pĕ dŏp rơngiă truh 40 phun kơphê, yap truh mơ̆n 20 kơsăk boh kơphê mơtah. Hŭi arăng  pĕ dŏp hĭ kơphê, anun sang anŏ gơmơi khom apah arăng pĕ hnuăl, samơ̆ yua boh kơphê aka ƀu tơsă abih ôh, anun yơh rơnoh pơhrui glăi hrŏ hĭ. Ƀing sat pĕ dŏp kơphê, gơñu wŏk tư̆ than, tăp năng  yua thong čơkăp trơ̆i than hlao djă ba ruač mă kơphê pơ anih pơkŏn, tơlơi anun yơh ngă sat kơ bơyan kơphê pơ anăp dơ̆ng. Thun anai, adơi ayong ƀing ngă bruă amăng plơi djru wai lăng, hyu tir na nao anun huăi  hơmâo tơlơi rơngiă arăng pĕ dŏp kơphê ôh, sang anŏ gơmơi tơguan tơsă abih kah nao pĕ mơtam”.

Tơring čar Dak Lak  ră anai hơmâo 209 rơbao ha kơphê, boh pơhrui glăi rĭm thun rơbêh 500 rơbâo tơn

Đơ đam să Ea Kpam hơmâo rơbêh 1.200 hektar kơphê, hmua mơnuih ƀôn sang pla kơphê pơ lu anih ƀiă či truh pơ treng guai plơi prong Ƀuôn Ma Thuôt hăng plơi prong Ƀuôn Hô. Thiếu tá Lưu Quang Chiến, Khua kông an să Ea Kpam, tơring glông Čư̆ Mgar brơi thâo, ƀơi hơdôm đơ đam kơphê jĕ giăm hăng să pơkŏn, ƀing sat juăt nao pĕ dŏp, ngă rung răng amăng  ană plơi, răm ƀăm dram gơnam ană plơi pla. Thun anai, kông an să ngă hrom djop sang bruă, khul grup, akŏ pơjing 8 grup wai lăng mă pô amăng plơi pla, ala ƀôn ngă bruă hyu tir, ĕp lăng anun yơh kơphê mơnuih ƀôn sang huăi arăng pĕ dŏp ôh.

“Kông an să hơmâo pơkra hơdră pok pơhai truh pơ rĭm grup wai lăng mă pô hăng grup tơdăm kơsung nao pơ anăp hyu tir amăng  mlam ƀơi kual hmua mơnuih ƀôn sang ƀiă mơnuih găn rơgao nao rai, kiăng tañ ƀuh tơlơi arăng dŏp kưp kơphê. Laih dơ̆ng, pơphun čih pôr tơlơi pơhing, rup amăng zalo, facebook să, tơring glông kơ hơdră, tơlơi soh sat dŏp kơphê mơ̆ng ƀing mơnuih soh sat, kiăng kơ ană plơi pla thâo răng kơđiăng. Krăp ĕp lăng ƀing mơnă arăng pok laih, glăi pơ sang anŏ, ƀing juăt dŏp gơnam arăng, kiăng pơgăn gơñu anun, pioh pơtô lăi na nao, mơ̆ng anun brơi gơñu lui hĭ tơlơi soh sat hyu dŏp gơnam arăng”.

Tơring čar Dak Lak ră anai, hơmâo rơbêh 209 rơbâo hektar đang kơphê, boh kơphê pĕ pơhrui rĭm thun juăt hơmâo 500 rơbâo tơn, anun yơh truh bơyan pĕ kơphê kiăng biă mă hơmâo mơnuih wai lăng đang kơphê. Tui hăng thượng tá Nguyễn Văn Quý-Kơ-iăng Khua anom tơhan pơlih pơgăn tơlơi soh sat mơ̆ng tơhan kông an tơring čar Dak Lak lăi, hrom hăng djop grup pơgang mă pơ plơi pla, kông an tơring čar pok pơhai lu hơdră, tui tơlơi thâo bruă mă, kiăng mă huet hăng pơgăn khul grup ƀing juăt hyu dŏp gơnam boh troh đang hmua, pơgang gơnam mơnuih ƀôn sang amăng bơyan hơpuă yuă, pơhlôm hơđong rơnuk rơnua kơ mơnuih ƀôn sang djop plơi pla.

“Anom tơhan pơlih Pơgăn tơlơi soh sat mơ̆ng kông an tơring čar pơpha ƀing ngă bruă hyu lăng sŭ nao truh pơ anih juăt hơmâo tơlơi dŏp kưp, pĕ dŏp kơphê, ngă hrom tơhan kông an tơring glông, plơi prong, hơduah ĕp, mă huet, pơkong ƀing soh sat juăt pĕ dŏp kơphê amăng bơyan pĕ kơphê. Pơphun pơtô hrăm kiăng thâo hluh pơgang mă dram gơnam mơnuih ƀôn sang; pơphun wai lăng tong ten ƀing đing đăo ngă soh, pơtô lăi djop sang sĭ mơdrô blơi kơphê arăng ba sĭ ƀu dưi blơi ôh kơphê aka ƀu thâo phun tơdŭ pô ñu ƀudah mơ̆ng pơpă hơmâo”./.

Tuấn Long pô čih-Nay Jek : Pơblang