VOV4.Jarai-Phrâo anai, Khua dêh čar pơtrun hiăp kơ anom bruă Jơlan glông Pơdŭ pơgiăng djop tơring čar, ƀôn prong amăng dêh čar pok jơlan “glông Mơtah” brơi gru kơnăl QR Code pioh djru ƀing ngă bruă sĭ mơdrô pơdŭ pơgiăng gơnam đang hmua hăng hơdôm mơta gơnam kiăng biă mă.

Mơ̆ng rơnuč blan 7/2021 truh ră anai, Gơnong bruă Jơlan glông Pơdŭ pơgiăng tơring čar Dak Lak hơmâo brơi gru kơnăl QR Code kơ 2000 anăn dưi rô nao rai jơlan “Glông mơtah”, kơ djop rơdêh pơdŭ pơgiăng ăt kah hăng djru mơnuih ƀôn sang rô nao rai gêh găl hloh hyu blơi gơnam sĭ mơdrô mơ̆ng đang hmua ƀudah hơdôm mơta gơnam kiăng biă mă kah hăng mơnong ƀong huă rĭm hrơi.

Ơi Đặng Quang Điện, Khua anom bruă ngă ƀong hrom bơwih bơwăng sĭ mơdrô pơdŭ pơgiăng 63 boh tơring čar mơ̆ng Dak Lak lăi, sang bruă gơñu hơmâo 45 boh rơdêh pơgiăng gơnam pioh pơgiăng boh troh, gơnam đang hmua mơ̆ng hơdôm tơring čar kual Dap Kơdư, ba nao pơ hơdôm tơring čar pơ gah kual Kơdư adih hăng plơi prong jưh jom Hà Nội pioh sĭ mơdrô.

Ƀing mơgăt rơdêh nao rai amuñ ƀơi anih pơgăn jơlan tơdah hơmâo gru kơnăl QR Code jơlan “glông mơtah”, găn nao pơ anih ĕp klin Covid 19 ƀơi djop jơlan

Lơ̆m Hà Nội hăng hơdôm tơring čar ngă tui Hră pơčrâo 16 mơ̆ng Khua dêh čar kơnuk kơna, bruă pơdŭ pơgiăng gơnam tam đang hmua kơđông glăi yua kơ ngă tui hơdră pel ĕp kman duăm ruă, pioh pơhlôm, pơgang klin Covid 19. Rơnuč blan 7 phrâo anai, gơnong bruă Jơlan glông Pơdŭ pơgiăng tơring čar Dak Lak pok jơlan anăn "glông mơtah", brơi gru kơnăl QR Code dưi brơi kơ rơdêh pơgiăng gơnam mơ̆ng lu sang bruă bơwih ƀong sĭ mơdrô gêh găl hloh amăng bruă rô nao rai pơdŭ pơgiăng gơnam tam nao pơ djop tơring čar pơkŏn yua dah khom ngă tui hơdră pơčlah mơnuih mơnam tui Hră pơčrâo 16 mơ̆ng Khua dêh čar Kơnuk kơna.

"Lơ̆m ƀuh tơlơi lăi pơthâo mơ̆ng sang bruă kơnuk kơna hơmâo tơlơi dưi lăi pơthâo brơi gru kơnăl QR Code dưi pơdŭ pơgiăng gơnam sĭ mơdrô ƀong huă rĭm hrơi, ƀing gơmơi rơkâo čih anăn pơthâo amăng plăng internet, ngă hră amuñ đôč. Tơdơi kơ čih anăn rơkâo jơlan “glông mơtah” arăng ngă brơi gru kơnăl QR Code ƀơi gơnong bruă Jơlan glông Pơdŭ pơgiăng tơring čar Dak Lak, gơmơi tŭ mă plăk kiăng thâo krăn rơdêh pô hlơi amăng 1-2 mông ngă hră giong yơh.

Laih hơmâo plăk anăn rơdêh, bruă pơgiăng gơnam nao pơ anih arăng pơgăn jơlan pioh pel ĕp kman ƀơi djop tơring čar, ƀôn prong tañ biă laih anun gêh găl hloh. Rơngiao kơ anun, abih bang ƀing adơi ayong mơgăt rơdêh amăng kông ty dưi ngă brơi hră nao ĕp kman test hmar Covid 19, hơmâo hră anun, găn nao ƀơi anih pơgăn jơlan ĕp kman klin Covid 19 huăi rơngiă mông, prăk kăk ôh”.

Dak Lak hơmâo 6 arăt jơlan dêh čar kah hăng jơlan: 14, jing jơlan amur Hồ Chí Minh, jơlan 14 C, jơlan 26, jơlan 27, jơlan 19 hăng jơlan 29 pơtruh nao rai hăng hơdôm tơring čar Lâm Đồng, Gia Lai, Dak Nông, Khánh Hòa, Phú Yên. Ră anai abih bang jơlan dêh čar anai lêng kơ hơmâo anih pơgăn jơlan pioh ĕp kman klin Covid 19 soh, pioh pơčrang kman amăng mơnuih hăng rơdêh mut nao rai amăng tơring čar.

Mơ̆ng lơ 19/7/2021 truh ră anai Gơnong bruă Jơlan glông Pơdŭ pơgiăng Dak Lak ngă brơi rơbêh 2000 gru kơnăl QR ”Code pioh rơdêh pơgiăng nao dưi nao pơ jơlan “Glông mơtah”sit pơgiăng gơnam ƀong huă rĭm hrơi

Trung tá, ơi Đạng Thanh Hòa-khua mua tơhan pơlih jơlan glông dŏ mă bruă pơ anih pơgăn jơlan ƀơi Krông Ƀŭk gah kông an tơring čar Dak Lak wai lăng, ñu brơi thâo, ƀơi anih pơgăn jơlan pioh ĕp kman Covid 19 mut nao rai pơ gah kual kơdư ngŏ tơring čar, jing ƀơi tơdrông tua Ia Hleo juăt cầu 110, să Êa Hleo, tơring glông Ea Hleo, tơkuh hăng guai tơring čar Gia Lai, rĭm hrơi hơmâo hơdôm rơtuh boh rơdêh hăng hơdôm rơbâo čô mơnuih mut nao pơ tơring čar Dak Lak.

Lơ̆m rơdêh pơgiăng gơnam hơmâo laih anăn gru kơnăl QR Code, yua kơ gơnong bruă Jơlan glông Pơdŭ pơgiăng tơring čar ngă brơi ăt dŏ hrơi blan mă yua, dưi ĕp lăng tañ hăng rô nao rai amuñ hloh.

“Anih tơhan pơlih jơlan glông krăo ĕp rơdêh ƀơi Krông Ƀŭk, pơpha bruă tơhan pơlih ngă bruă hrơi mlam mơtam ƀu pơdơi ôh pioh pơgang tơlơi rơnuk rơnua rô nao rai ƀơi jơlan glông ăt kah hăng ngă bruă pơhlôm, pơgang klin Covid 19. Ngă tui tơlơi git gai jơlan “glông mơtah” mơ̆ng khua dêh čar kơnuk kơna, abih bang ling tơhan ngă bruă amra ĕp lăng gru kơnăl QR Code, tơdah anom bruă pơdŭ pơgiăng arăng ngă brơi laih gru kơnăl aka ƀuh abih hrơi blan mă yua ôh, gơmơi brơi nao tañ yơh ƀơi anih dŏ pơgăn jơlan anun”.

Tui hăng ơi Lê Đình Minh-Kơ-iăng khua gơnong bruă Jơlan glông Pơdŭ pơgiăng tơring čar Dak Lak, ngă tui tơlơi git gai mơ̆ng Kơnuk kơna ăt kah hăng Ding jum Pơdŭ pơgiăng bruă djru kơ djop sang bruă sĭ mơdrô apah rơdêh pơdŭ pơgiăng gơnam tam ƀong huă rĭm hrơi, gơnong bruă lăi pơthâo djop sang bruă sĭ mơdrô apah rơdêh pơdŭ pơgiăng ƀơi Dak Lak čih anăn, rơkâo dưm gru kơnăl QR Code pơthâo pô rơdêh, kiăng amuñ rô nao rai pơdŭ pơgiăng gơnam tui jơlan “Glông mơtah”.

Bruă ngă brơi gru kơnă QR Code dưi nao rai ƀơi jơlan “Glông mơtah” arăng brơi hăng boh thâo ia rơgơi plang internet ta juăt lăi hăng điện tử, ngă hră pơar amuñ, hmar hăng kơnong ƀiă mông aka truh sa mơguah ôh arăng ngă brơi hră gru kơnăl. Ơi Lê Đình Minh lăi:

“Yap truh ră anai gơmơi hơmâo ngă brơi 2.036 gru kơnăl QR Code kơ djop rơdêh pơdŭ pơgiăng gơnam ƀong huă rĭm hrơi nao pơ djop tơring čar, ƀôn prong amăng dêh čar. Gơnong bruă Jơlan glông Pơdŭ pơgiăng ăt lăi pơthâo kơ djop sang bruă sĭ mơdrô čih anăn rơkâo tŭ mă gru kơnăl QR Code jơlan “glông mơtah” pioh rô nao rai amuñ hloh amăng bruă podŭ pơgiăng gơnam ƀong huă rĭm hrơi lơ̆m hrơi mông hơmâo klin kheng hlăk tơnap tap amăng djop tơring čar lơ̆m dêh čar.

 Gơmơi brơi grup mă bruă hrơi mlam hăng abih 7 hrơi sa wơ̆t hrơi tơjuh pioh ngă brơi hră djop sang bruă sĭ mơdrô apah rơdêh pơdŭ pơgiăng. Anom bruă sĭ mơdrô kơnong ngă hră mơ-it amăng plăng internet đôč tơdơi 1-2 mông ĕp lăng tơdah djop tơlơi gêh găl gơmơi ngă brơi gru kơnăl dưi rô nao rai tañ hloh hơđong ƀiă đuăi hyu”.

Nay Jek: Pơblang