VOV4.Jarai-Tlam lơ 27/12, Gơnong bruă Gru grua Pơrơguăt drơi jăn hăng Tuai čuă ngui Dak Lak jơnum hăng anom bruă sĭ mơdrô ba tuai hyu ngui kiăng pơčrông sai kơ hơdră pơhưč tuai hyu ngui, rŭ glăi bruă tuai čuă ngui amăng tơring čar tơdơi kơ bơbeč djơ̆ kơtang biă mă klin covid 19 ngă. Tui hăng tơlơi pơhing amăng mông jơnum, thun 2021, Anom bruă tuai čuă ngui tơring čar Dak Lak bơbeč kơtang yua klin ngă.

Mrô tuai rai pơ Dak Lak kơnong 414 rơbâo wơ̆t đôč; prăk pơhrui glăi mơ̆ng čơkă tuai hơmâo 355 klai prăk, hrŏ mơkrah pơkă hăng thun 2020. Kiăng rŭ glăi bruă tuai čuă ngui, Jơnum min mơnuih ƀôn sang tơring čar Dak Lak hơmâo ngă hră pơtrun, akŏ bruă kiăng pơgang tơlơi rơnuk rơnua klin covid 19; djru pơsir brơi tơlơi tơnap tap mơ̆ng anom bruă sĭ mơdrô ba tuai hyu ngui tañ hơđong glăi, rŭ glăi ƀơ ƀrư̆ bruă tuai hyu ngui.

Tơring čar amra pơtrut bruă mă, pôr pơthâo bruă tuai čuă ngui nao pơ tơring čar Khánh Hoà, Đã Nẵng hăng lu rơnoh prăk djru pơtrut tuai čuă ngui. Pơđĭ tui lu hloh gơnam sĭ mơdrô tuai čuă ngui djơ̆ găl.

Nay Jek: Pơblang