VOV4.Jarai-Lơ 10/12, djop plơi pla, tơring glông amăng tơring čar Dak Lak pơphun tlâ̆o vaccine Covid 19 kơ čơđai sang hră gưl dua hơdôm ƀing mơ̆ng 12 thun truh 15 thun. Mrô čơđai sang hră dưi tlâ̆o tal anai năng ai 120 rơbâo čô, bruă mă tlâ̆o pơgang ăt ngă tui djơ̆, tơpă mơ̆ng hnơr thun lu trun pơ ƀiă tui.

Ƀing čơđai sang hră arăng pơkă lăng, lăi pơthâo hlâo kơ tlâ̆o vaccine

Tui hăng anun, amăng rơwang hrơi tơjuh anai, ƀing čơđai sang hră anih 8 hăng anih 9 tlâ̆o hlâo, truh rơwang hrơi tơjuh pơ anăp čơđai sang hră anih 7 dơ̆ng dưi tlâ̆o pơgang hăng čơđai sang hră anih 6 hlơi pô djop 12 thun.

Kiăng pơhlôm djop kơ bruă  tlâ̆o pơgang klin Covid 19, ăt ngă tui djơ̆ 5 mơta tơlơi pơtrun pơgang klin amăng anih pơtum lu mơnuih mơnam, anom bruă ia jrao tơring čar Dak Lak hơmâo ngă bruă hăng djop sang hră, pơphun brơi pôr pơthâo kơ ƀing amĭ ama čơđai sang hră, dăp mông, pơgiăng nao ană bă tlâ̆o pơgang djơ̆ mông pơkă; kiăng huăi pơtum lu mơnuih. Laih dơ̆ng, pơpha tơhan mă bruă ĕp lăng tơdơi kơ tlâ̆o vaccine giong, hŭi hơmâo tơlơi hơgĕt ia jrao pơglăi thơ pơsir hmao kru.

Nay Jek: Pơblang