VOV4.Jarai - Kiăng pơsir bruă “Čơđai sang hră 3 mơta tơlơi klă” hăng pơčeh boh thâo ia rơgơi amăng sang hră gưl 3, tơring čar Dak Lăk hơmâo pơphun ngă ring bruă “Sang čơđai 3 mơta tơlơi klă hăng anih brơi ƀing čơđai pơčeh tơlơi rơgơi” ƀơi sa, dua boh sang hră gưl 3. Anih anom anai hơmâo pơmin amra jing anih pơbưp, pơhrăm nao rai kơplah wah ƀing čơđai hăng nai pơtô đah mơng pơtrut hloh dong bruă pơčeh phrâo amăng ƀing čơđai sang hră.

Mơng thun hrăm anai, sang hră gưl 3 Trần Phú hơmâo ba yua “Anih brơi čơđai pơčeh tơlơi rơgơi” mơng sang hră. Anai jing bruă hơmâo Hlăk ai tơring čar Dak Lăk djru ngă hăng mrô prăk 50 klăk prăk, mă yua anih jơnum ƀing nai hơmâo pơkra, pơhrup ming hiam jing anih rơhaih, prong, hơmâo tu pioh hră kơsem min boh thâo, pơtô hrăm bruă čar, pơphun bơwih ƀong; pơdă hơdôm kơčăo bruă yua ƀing čơđai pơkra hơmâo mă pri amăng hrơi pơplông. Vàng Ngọc Đan, čơđai sang hră hrăm anih 12A1 brơi thâo, tơdơi kơ mă pri sa amăng thun hlâo, thun anai adơi Đan hrŏm hăng ƀing gŏp ñu ngă dong mơng bruă pơplông Pơčeh phrâo pơkra boh thâo kĭ thuâ̆t gưl tơring čar. Amăng hrơi mông pơčlah mơnuih mơnam yua klin Covid-19, Anih brơi čơđai pơčeh phrâo mơng sang hră jing anih lăp djơ̆ brơi ƀing čơđai pơđok thim hră, bơlăi nao rai kơ bruă kơsem min boh thâo pơkra măi mok:

“Lơ̆m ƀing gơmơi hrăm mơng ataih amăng internet lĕ bưp lu tơlơi tơnap biă lơ̆m kiăng pơhiăp tom, tơña kơ ƀing nai. Pơgi kơdih lơ̆m klin tơdu ƀiă, gơmơi amra bưp ƀing nai, mă anih pioh kơsem min pơčeh tơlơi rơgơi anai ngă anih tơña nai pơtô klă hloh, đah mơng hơmâo lu hơbô̆ bruă phrâo”.

Ayong Trần Minh Tú, Khua Hlăk ai sang hră gưl 3 Trần Phú brơi thâo, anai lĕ anih pioh kơ ƀing čơđai hăng nai pơtô tơña, hrăm, kơsem min boh thâo hăng pơjing tơlơi pơčeh phrâo, pơkra boh thâo phrâo kơ djŏp tơlơi pơplông.

Kiăng pơsur ƀing čơđai pơčeh tơlơi rơgơi hăng kơsem min boh thâo, rim thun sang hră lêng pơphun pơplông pơčeh tơlơi rơgơi pơkra măi mok boh thâo ƀơi sang hră hăng ruah mă hơdôm tơlơi pơčeh phrâo rơgơi hloh ba pơplông pơ tơring čar. Thun hrăm anai, tơlơi pơplông ăt pơphun mơng akŏ blan 11, ră anai glăk hơmâo mă tơlơi pơmin, hơdră ngă bruă mơng ƀing čơđai čih anăn pơplông. Tơdơi kơ ruah mă hơdôm kơčăo bruă tơlơi pơmin dưi hloh lĕ ƀing nai amra pơtô hăng djru ba ƀing čơđai ngă pơgiong hĭ đah mơng ba pơplông.

“Hăng bruă brơi ƀing čơđai pơčeh phrâo boh thâo amra pơphun hơdôm bruă ngă pơhưč pran jua ƀing čơđai. Blung a lĕ tơlơi pơplông pơčeh phrâo boh thâo pơkra măi mok kĭ thuâ̆t gưl tơring čar. Rơngiao kơ anun amăng thun hrăm 2021-2022, pơđĭ tui tơlơi rơgơi mơng ƀing nai pơtô ba ƀing čơđai, črâo brơi, lăi brơi tơlơi thâo pơkra măi mok hiư̆m pă, mơng anun djru pok brơi tơlơi pơmin kơ ƀing čơđai thâo pơkra hiư̆m pă, pơtô brơi tŏng ten đah mơng hơmâo gơnam pơkra klă, ba tơlơi pơčeh phrâo anai pơdă brơi abih bang lăng”.

Sang pioh kơ čơđai 3 mơta tơlơi klă jing hơbô̆ bruă pơđĭ tui tơlơi pơmin pơgang ba anih hrăm hră kơ ƀing čơđai.

Tui hăng ayong Trần Đoàn Tới, Kơ-iăng khua Hlăk ai tơring čar, Khua khul čơđai sang hră gưl prong tơring čar Dak Lăk, amăng thun anai, hơmâo tơlơi djru mơng Khul čơđai sang hră gưl prong Việt Nam, tơring čar Dak Lăk hơmâo ruah ngă 4 ring bruă “Anih brơi čơđai sang hră gưl prong pơčeh tơlơi rơgơi hăng Sang čơđai sang hră 3 mơta tơlơi klă” ƀơi 4 boh sang hră gưl 3 mơng hơdôm boh tơring glông anun lĕ Krông Bông, Krông Pač, Ea Sup hăng plơi prong Buôn Ma Thuột. Anai lĕ hơdôm anom bruă hmư̆ hing amăng bruă kơtưn laih dong anai lĕ sang hră pơ kual ataih yaih, kual giăm guai dêh čar. Rim ring bruă hơmâo prăk djru lĕ 50 klăk prăk, hơmâo 2 mơta bruă, amăng anun “Sang dŏ čơđai sang hră 3 mơta tơlơi klă” hơmâo pơkra hăng tôl, pơsơi, hơmâo pơbung pơging; gah anăp hơmâo kơƀang prong in tơlơi pơhing, tơlơi pơkă mơng bruă “Čơđai sang hră 3 mơta tơlơi klă”, gah tlôn pơgăn jing 3 bơnah či pioh hră pơ-ar ƀu yua, get kơčai, laih anun hơmâo pioh ƀơi lan sang hră. “Anih pioh kơ ƀing čơđai pơčeh phrâo tơlơi rơgơi” hơmâo anih ngui ngor kiăng ƀing čơđai ngui ngor, kơsem min boh thâo. Rim hơbô̆ bruă ăt hơmâo djru ba rơbêh 100 hơdrôm hră djŏp mơta.

Ayong Trần Doãn Tới lăi, hơdôm ring bruă anai amra djru brơi hơdôm anom bruă dưi pok pơhai tŭ yua hloh djŏp bruă pơčeh phrâo hăng čơđai sang hră 3 mơta tơlơi klă amăng sang hră, pơtrut kiăng čơđai rơguăt bruă, kơsem min boh thâo, ngă pơhưč amăng bruă pơtô hăng hrăm ƀơi sang hră gưl 3.

“Hrơi blan pơ anăp, bruă pơphun ngă bruă “Čơđai sang hră 3 mơta tơlơi klă” hăng “Hlăk ai pơčeh phrâo tơlơi rơgơi” lĕ ăt amra ngă ƀơi abih bang anih amăng hơdôm boh sang hră gưl 3. Mơng 4 anih pioh pơčeh tơlơi rơgơi blung a anai lĕ gơmơi amra pok prong hăng gir truh rơnuč rơwang bruă amăng thun 2022 amra hơmâo 10 anih pioh čơđai pơčeh tơlơi rơgơi ƀơi sang hră. Hơdôm tơlơi anun amra jing pơtrut pơsur kiăng hrơi blan pơ anăp hơdôm boh sang hră gir hloh dong, ngă tŭ yua djŏp bruă čơđai pơčeh tơlơi rơgơi  hăng 3 mơta tơlơi klă”.

Tu pioh hră amăng Anih pioh kơ ƀing čơđai pơčeh tơlơi rơgơi mơng Sang hră gưl 3 Nguyễn Bỉnh Khiêm tơring glông Krông Pač.

Hơdôm thun giăm anai, Khul ƀing kơsem min boh thâo phrâo hăng kĭ thuâ̆t tơring Dak Lăk hơmâo ngă hrŏm hăng Gơnong bruă pơtô hăng pơjuăt, gơnong bruă kơsem min boh thâo phrâo măi mok pơphun pơplông pơčeh phrâo tơlơi rơgơi pioh kơ ƀing hlăk ai čơđai anet. Thun hlâo, hơmâo 123 hơbô̆ bruă, gơnam pơkra mơng 264 čô mơnuih, grup pơplông. Amăng anun, pri yôm biă mă brơi kơ hơbô̆ bruă “Măi kơdah mă hơjăn hăng pơkă mrô yua ia amăng sang anŏ” mơng sa čô čơđai hrăm ƀơi să Dur Kmăn, tơring glông Krông Ana. Tơlơi pơplông anai ngă mơdưh tơlơi hor, tơlơi rơgơi mơng ƀing čơđai ƀơi Dak Lăk, djru ƀing čơđai thâo rơgơi hloh, pơtrut bruă bơkơtưn hrăm hră, mă bruă rơgơi.

VOV Tây Nguyên: Čih - Siu H’Mai: Pơblang