VOV4.Jarai - Klin Covid-19 ăt dŏ kơtang đôč, bruă pơtô hrăm ƀrô pơhlôm rơnuk rơnua ƀrô khŏm ngă giong bruă pơtô hrăm jing ngă tơnap kơ hơdôm boh sang hră ƀơi Dak Lăk, bưp lu tơlơi lông lăng pơ anăp. Thâo pơplih, hơdeč hmar amăng bruă mă glăk hơmâo anom bruă pơtô hrăm Dak lăk pơphun ngă đah mơng dưi ngă dua mơta bruă anai.

Tơdơi giăm 3 wơ̆t hrơi tơjuh pơtô mơng ataih, nai pơtô hăng čơđai sang hră muai tơring kual Phước An, tơring glông Krông Pač, tơring čar Dak Lăk hok mơ-ak, dŏ čang lơ̆m hmư̆ tơlơi pơhing mơng lơ 4/10, čơđai pơ “kual mơtah” dưi nao sang hrăm hră. Samơ̆ tơdơi kơ ha wơ̆t hrơi tơjuh nao hrăm pơ sang hră, Jơnum min mơnuih ƀon sang tơring glông pơsit brơi pơdơi hrăm pơ sang hră, pơwơ̆t glăi hrăm mơng ataih dong yơh yua dah klin ăt dŏ kơtang mơn. Nai Trần Thị Nga, khua sang hră muai tơring kual Phước An brơi thâo, ƀu dŏ kơtuă hơget ôh kơ tơlơi anai yua dah hơmâo pơmin hlâo yơh.

“Sang hră muai tơring kual lêng prăp lui čơkă ƀing čơđai rai hrăm. Sang hră hơmâo kih rơmet anih hrăm, brơi ƀing nai pơhrup anih hrăm. Sang hră pơtô pơblang brơi abih bang nai pơtô, mơnuih mă bruă kơ bruă pơgang klin tui tơlơi git gai mơng ƀing khua. Pơphun brơi ƀing nai pơkra video pơtô ba ƀing čơđai thâo thăi amăng tơlơi hơdip anai, kơ bruă pơgang klin hăng hơdôm tolơi pơtô hrăm phara pioh kơ ƀing čơđai 5 thun mơ-it nao pơ amĭ ama ƀing čơđai sem lăng hăng pơtô brơi ană bă gơñu pơ sang”.

Sa anih hrăm pơtô ƀơi sang hră či tơring kual Phước An, tơring glông Krông  Pač.

Hăng gưl hrăm prong hloh kah hăng: gưl 2, 3, sang hră Giáo dục thường xuyên, rơngiao kơ ngă klă bruă pơgang klin, hơdôm boh sang hră hơmâo ruah mă hơdră pơtô, hrăm, pơplih tơlơi hrăm kiăo tui hrơi mông, lăp djơ̆ hăng kual plơi pla, tŭ yua. Nai Đặng Như Sang, Kơ-iăng khua sang hră gưl 2 Phước An, tơring kual Phước An, tơring glông Krông Pač, tơring čar Dak Lăk brơi thâo:

“Ƀing khua amăng sang hră thâo hluh rơđah laih jơlan ngă bruă “pơgang klin kah hăng pơkơdong ayăt” prăp lui kơjăp pơplih bruă hrăm ƀơi sang hră hơdai hrăm mơng ataih tơdah hơmâo tơlơi truh. Amăng hrơi pơtô hrăm ƀơi anăp, gơmơi amra lăi pơhmư̆ kơ ƀing nai pioh hrơi ƀơi thơ hiam pioh pơtô ƀơi anăp, ƀing nai amra pơtô tơlơi hrăm kiăng hrăm biă mă hloh kơ ƀing čơđai, bơ mông dŏ glăi lĕ pơtô mơng ataih brơi čơđai hơdor glăi hơdôm tơlơi hơmâo hrăm, kiăng čơđai kơjăp hloh tơlơi hrăm”.

Bơ ƀơi tơring glông Krông Bông, Grup pơphô bruă ƀing čơđai tơring glông Krông Bông hơmâo pok anih hrăm “khăn hồng”, yua hlăk ai, čơđai sang hră gưl prong pơtô ba bruă hrăm kiăo tui grup ƀơi plơi pla mơtăm. Rơbêh ha blan anai, rơngiao kơ bruă hrăm online, čơđai mơng sang hră Đại học Đà Nẵng rim hrơi nao čơkă ƀing čơđai hrăm gưl 1 glăi pơ sang gơñu hrăm hră. Anai lĕ ƀing čơđai sang anŏ tơnap, ƀu hơmâo măi computer, telephôn rơgơi či hrăm mơng ataih. Adơi Nguyễn Bích Phương brơi thâo, yua klin Covid-19 hnun jing ñu ƀu thâo nao pơ Đà Nẵng ôh, jing dŏ pơ sang hrăm online. Rơngiao kơ mông hrăm, ñu pioh mông nao djru ba anih hrăm “Khăn hồng” dong.

“Hơmâo thâo ƀơi tơring glông hơmâo pơphun pok anih hrăm Khăn hồng djru ba ƀing čơđai sang anŏ tơnap ƀudah ƀu dưi hrăm online. Kâo rơkâo djru ba ƀing čơđai, kiăng ƀing adơi dưi hrăm online amăng hrơi hơmâo klin tơnap tap anai. Lơ̆m ƀuh ƀing čơđai hơmâo hrăm rim hrơi, kâo lăng mơ-ak biă yua dah hơmâo pơtô brơi ƀing adơi hrăm djŏp tơlơi hrăm”.

Anih hrăm “Khăn hồng” ƀơi tơring glông Krông Bông.

Krông Bông lĕ tơring glông pơ kual ataih mơng tơring čar Dak Lăk. Ƀơi hơdôm plơi pla anai, lơ̆m klin Covid-19 dưi pơgăn hĭ, čơđai sang hră gưl 3 ăt hơmâo nao hrăm ƀơi sang hră mơn. Kơnong ƀing čơđai gưl 1 ăt hrăm online mơn. Ayong Bùi Tấn Lợi, Khua grup pơphô bruă ƀing čơđai tơring glông Krông Bông brơi thâo: bruă pok anih hrăm “Khăn hồng” ƀơi hơdôm boh plơi pla kiăng djru ba ƀing čơđai dưi hrăm amăng bơyan hơmâo klin. Tui anun, ƀing čơđai sang hră gưl prong nao pơtô ba tơl sang ƀudah iâu 2, 3 čô čơđai nao hrăm pơ sang ƀing gơñu či pơtô ba laih anun khŏm kiăo tui tơlơi pơtrun pơgang klin Covid-19.

“Anai lĕ anih hrăm djru tañ kơ ƀing čơđai. Ƀing nao djru lĕ hlăk ai, čơđai sang hră gưl prong, nai pơtô gơgrong bruă wai lăng grup ƀing čơđai djă ba măi computer, telephôn nao pơ sang ƀing čơđai. Ră anai, gơmơi glăk hơmâo 10 anih hrăm. Anai lĕ hơbô̆ bruă phrâo, yôm biă mă amăng mông anai hăng hrơi blan pơ anăp”.

Ƀơi anăp tơlơi ngă sat kơtang mơng klin kheng, Jơnum min mơnuih ƀon sang tơring čar Dak Lăk hơmâo jao kơ hơdôm tơring glông pơkra mă hơdră pơtô hrăm lăp djơ̆. Yă Lê Thị Kim Oanh, Kơ-iăng khua Gơnong bruă pơtô pơjuăt tơring čar Dak Lăk brơi thâo, anom bruă pơtô hrăm Dak Lăk thâo hluh djŏp tơlơi tơnap tap amăng mông hơmâo klin. Gơnong buă rơkâo kơ Jơnum min mơnuih ƀon sang tơring čar brơi mă yua djŏp hơdră ngă bruă klă, đah mơng dưi pơgăn hĭ tơlơi ngă sat kơ bruă pơtô hrăm, samơ̆ ƀu pơplih anŏ klă mơng bruă pơtô hrăm ôh.

“Rơngiao kơ bruă hơdôm boh sang hră kơjăp bruă pơgang klin mă pô tui anun, ăt hơmâo mơn bruă čih pơkra lu jơlan hơdră pơtô hrăm phara kiăng dưi pơtô amăng djŏp mơta tơlơi truh pơkŏn dong tơdah hơmâo, anun lĕ pơplih bruă pơtô hrăm kiăo tui tơlơi pơplih mơng klin mơn. Mơng anun kiăng bruă ƀrô pơgang klin, ƀrô pơhlôm bruă pơtô hrăm dưi pơphun djơ̆ tơlơi pơkă”.

Hăng tơlơi ngă bruă hơdeč hmar, prăp rơmet lui hlâo đah mơng dưi pơtô hrăm amăng mông hơmâo klin, anom bruă pơtô pơjuăt Dak Lăk glăk gir khŏm pơhlôm rơnuk rơnua hăng pơtô klă amăng thun hrăm phrâo./.

Siu H’Mai: Pơblang