VOV4.Jarai - Hrơi blan rơgao, Jơnum min djŏp djuai ania mơnuih mơnam djŏp gưl ƀơi tơring čar dak Lăk hơmâo pơphun ngă lu bruă sit nik jak iâu abih bang mơnuih ƀon sang gum tơngan pơgang klin. Mơng anun, hrŏm hăng djŏp gưl ping gah, gong gai hăng abih bang mơnuih ƀon sang dưi pơgang klin, pơgang ba tơlơi suaih pral kơ abih bang mơnuih.

Tơdơi kơ hrơi blan guang dar pơgang klin Covid-19, tơlơi hơdip neh met wa ƀơi ƀuôn Tơng Jŭ, să Ea Kao, plơi prong Buôn Ma Thuột jing pŏt glăi tui hơđăp laih, kiăo hmao mơn bơyan pĕ kơphê. Yă H’Yam Bkrông, Khua plơi ƀuôn Tơng Jŭ ră ruai, amăng akŏ blan 10, lơm amăng plơi hơmâo lu mơnuih ƀă klin Covid-19 hăng hơdôm rơtuh čô mơnuih ruă, amăng plơi hơmâo rơbêh 440 boh sang anŏ, 2.200 čô mơnuih khŏm dŏ amăng anih guang dar, kŏm tơbiă hyu, hơmâo ƀing ơi ia jrao krăp lăng. Yua hơmâo tơlơi gum tơngan, djru ba mơng djŏp gưl, anom bruă, ƀing djru mơnuih tơnap tap, mră bruă klă mơng grup pơgang Covid-19, neh met wa hơđong pran jua dŏ pơčlah, ngă tui tơlơi pơtrun pơgang klin. Tơlơi gum pơgôp, ha pran jua mơng mơnuih ƀon sang jing djru plơi pla dưi pơgăn klin, ba tơlơi hơdip pot glăi tui hơđăp.

“Mơng gưl tơring čar truh pơ plơi pla, hơmâo ƀing juăt djru mơnuih tơnap tap lêng djru ba ană plơi pla amăng hrơi pơčlah. Grup pơgang Covid-19 mơng plơi hơmâo 17 čô ngă bruă abih pran jua mơtăm yơh, gir bơwih brơi neh met wa mơng ƀong huă truh kơ bơwih ƀong kah hăng rông bui, rơmô lĕ grup covid ăt nao djru ba mơn, yua hnun neh met wa jing hơđong pran dŏ pơ sang. Ră anai pot glăi tơlơi hơdip tui hơđăp laih ăt khŏm pơtô pơblang, pơtă pơtăn kơ neh met wa khŏm ngă tui klă bruă pơgang klin”.

Jơnum min djŏp djuai ania mơnuih mơnam lĕ anih čơkă mă tơlơi djru pơgang klin Covid-19.

Amăng tơring čar Dak Lăk, hơdôm grup covid mă bruă ƀơi hơdôm boh plơi pla gum hrŏm hăng grup tơhan nao hlâo pơgang klin. Truh mông anai, tơring čar ăt dŏ djă bong na nao 4.218 grup covid amăng plơi pla ƀơi 15 boh tơring glông, plơi prong, phun ñu lĕ hơdôm anom bruă čar, khul grup amăng tơring čar. Bruă mă phun mơng grup lĕ krăp lăng ƀing rai mơng anih hơmâo klin, bruă dŏ pơčlah pơ sang, pơtô pơblang iâu pơthưr mơnuih ƀon sang ngă tui klă hơdră pơgang klin. Yă H’Kim Hoa Byă, Khua Anom pơtô ba mơnuih ƀon sang, Khua Jơnum min djŏp djuai ania mơnuih mơnam Việt Nam tơring čar Dak Lăk brơi thâo, rơngiao kơ mă bruă ƀơi plơi pla, anom bruă djŏp gưl ăt hyu jak iâu abih bang djru bruă pơgang klin ƀơi anih; pok pơhai sa, dua hơbô̆ bruă klă, dưi ngă đah mơng djru ba ƀing ơi ia jrao, ling tơhan glăk pơgang klin.

“Pơtrut tui pran jua thâo gum djru nao rai, biă ñu lĕ hơdôm boh sang hăng rim čô mơnuih ăt thâo hluh hloh mơn amăng bruă pơgang klin. Tal 2 lĕ ăt hơmâo lu tơlơi gum djru, gum pơgôp kah hăng asơi huă khăp pap ƀudah asơi huă 0 prăk. Rim čô mơnuih thâo hluh tui tơlơi gơgrong bruă mơng pô amăng bruă pơgang klin covid, djru ba gong gai iâu pơthưr abih bang mơnuih gum djru đah mơng djru ba hơdôm anih dŏ pơčlah ăt kah hăng hơdôm anih dŏ gak, anih pơgăn tơbiă hyu”.

Ơi Phạm Minh Tấn, Kơ-iăng khua git gai Ping gah tơring čar Dak Lăk lăi, Jơnum min djŏp djuai ania mơnuih mơnam djŏp plơi pla ƀơi Dak Lăk hơmâo pơtrut đĭ klă tơlơi gum pơgôp thâo pap nao rai mơng abih bang mơnuih ƀon sang gum pơgang klin Covid-19. Kiăo tui anom bruă anai, truh ră anai, tơring čar hơmâo čơkă mă hơdôm anom bruă, khul grup, anom bơwih ƀong, ƀing juăt djru mơnuih tơnap hăng mrô prăk rơbêh 34,5 klai prăk; 10.000 kơdung djru mơnuih tơnap, 200.000 boh măi kit pơčrang kman Covid-19 hrŏm hăng lu gơnam yua gah ia jrao bơwih brơi bruă pơgang klin Covid-19. Jơnum min djŏp djuai ania ƀơi djŏp gưl ăt iâu pơthưr hăng ba nao hơdôm rơtuh tơn gơnam ƀong huă djru ba mơnuih ƀon sang ƀơi anih kŏm tơbiă hyu hăng djru ba ling tơhan, ơi ia jrao pơgang klin.

“Jơnum min djŏp djuai ania mơnuih mơnam hơmâo ngă klă laih tơlơi anai, hăng bruă jak iâu gum djru gơnam tam djru mơnuih ƀon sang tơnap tap. Ping gah tơring čar, gong gai djŏp gưl, ping gah djŏp anih, wơ̆t hăng anom bruă čar lêng čih pioh bơni kơ tơlơi gum djru prong mơng Jơnum min djŏp djuai ania amăng hrơi blan rơgao. Ƀing ta đăo gơnang kơ pran jua gum pơgôp mơng abih bang djuai ania amra dưi pơgang glăi klin Covid-19”.

Jơnum min djŏp djuai ania mơnuih mơnam djŏp gưl ƀơi Dak lăk pơtrut klă tơlơi gum pơgôp, iâu pơthưr mơnuih ƀon sang gum pơgang klin.

Pơtrut tui tơlơi gum pơgôp, iâu pơthưr abih bang mơnuih ƀon sang gum ngă, Jơnum min djŏp djuai ania mơnuih mơnam Dak Lăk ăt glăk gir gum djru hăng gong gai plơi pla lăng ba, djru ba mơnuih ƀon sang. Tơlơi gum hrŏm ha pran jua hăng tơlơi thâo hluh mơng rim čô mơnuih amăng plơi pla amra pơjing rai pran kơtang dưi pơgang klin tañ, tañ ba glăi tơlơi hơdip tui hơđăp.

H’Xíu H’Mốc: Čih - Siu H’Mai: Pơblang