VOV4.Jarai - Tui hăng Gơnong bruă pơtô hăng pơjuăt tơring čar Dak lăk, hơdôm plơi pla amăng tơring čar glăk ječ ameč prăp rơmet giong kơ thun hrăm phrâo 2021-2022. Hrơi blan rơgao, hơdôm boh plơi pla ăt lăng glăi abih, blơi thim gơnam pơtô hrăm, gơnam pioh ngui ngor; man pơdong, pơkra ming klă sang hră, anih hrăm. Biă ñu, amăng hrơi hơmâo klin Covid-19 glăk kơtang tui anai, bruă pơgang klin hăng pơhlôm rơnuk rơnua kơ ƀing čơđai, nai pơtô, mơnuih wai lăng sang hră lêng hơmâo ngă hlâo.

Pioh čơkă rơbêh 400 čô čơđai mơng 10 boh anih hrăm thun 2021-2022, Sang hră muai Hoa Ban, să kual ataih Čư̆ K’bang, tơring glông Ea Súp hơmâo pơkra anih hrăm, pơkra glăi phrâo lu kơƀang grê, pơkra glăi anih ngui gah rơngiao, kih rơmet abih lan sang hră. Nai pơtô Nguyễn Thị Hoa - Khua sang hră lăi pơthâo.

“Amăng hrơi mông Jơnum min mơnuih ƀon sang să mưn mă sang hră ngă anih brơi arăng dŏ pơčlah pơgang klin lĕ sang hră pioh mông hyu iâu, čih anăn čơđai hrăm hră. Truh lơ 20/8 laih rơgao, lơ̆m Jơnum min mơnuih ƀon sang să ba glăi lĕ sang hră pơkra ming, pruih ia jrao pơdjai kman mač ƀơi abih bang anih amăng sang hră. Kơ gơnam pioh pơtô hăng hrăm, sang hră ăt hơmâo ƀing khua lăng ba brơi prăk blơi lu gơnam pioh ngui gah rơngiao, 49 boh kơƀang grê phrâo hăng lu mơta gơnam pơkŏn dong”.

Hơdôm boh sang hră muai ƀơi tơring glông Ea Súp hơmâo prăp lui giong laih či čơkă čơđai sang hră nao hrăm.

Ƀơi să gah guai lŏn ia Ea Bung, nai Nguyễn Thành Đông - Khua sang hră gưl 2 Ea Bung, brơi thâo, thun hrăm 2021-2022 sang hră hơmâo 220 čô čơđai. Rơnuč blan 7, să Ea Bung hơmâo 7 čô mơnuih ƀă klin Covid-19, să khŏm ngă tui tơlơi pơčrâo trun mrô 16 mơng Kơnuk kơna či pơgang klin. Yua hnun, djŏp bruă prăp rơmet kơ thun hrăm phrâo jing kaih hĭ. Tơdơi kơ hrơi mông dŏ pơčlah abih bang, hơmâo tơlơi gum djru mơng djŏp anom bruă, bruă prăp lui kơ thun hrăm phrâo ƀiă giong laih.

“Phrâo rơgao sang hră hơmâo Jơnum min mơnuih ƀon sang tơring glông djru pơkra 8 anih hrăm, amăng anun hơmâo 6 anih hrăm dŏ pơ anih hơmâo 2 gưl sang hăng 2 anih hrăm ƀơi tơdruai sang cấp 4, ră anai pơkra giong laih; bơ pơ anăp anai amra pơkra ming anih ƀing khua, ƀing nai mă bruă. Hơjăn sang hră lĕ hơmâo blơi djŏp laih gơnam yua, hră pơ-ar, gai čih brơi kơ ƀing  nai pơtô hăng ƀing čơđai kiăng bruă pơtô hrăm klă hloh. Ƀing gơmơi ăt lăi pơthâo laih kơ sang anŏ ƀing čơđai tui plang Zalo, Facebook hrơi pơphun nao hrăm mơng Gơnong bruă pơtô hăng pơjuăt lĕ amăng lơ 1/9 anai”.

Tơring glông ƀơi guai lŏn ia ta Ea Súp ră anai hơmâo 48 boh sang hră mơng anih muai truh gưl 3 hăng sang hră pơtô rese giáo dục thường xuyên. Thun hrăm 2021-2022, hơdôm boh sang hră hơmâo 19.350 čô čơđai sang hră. Tui hăng ơi Nguyễn Văn Khóa - Khua anom bruă pơtô hăng pơjuăt tơring glông Ea Súp, prăp lui kơ thun hrăm phrâo, kơnuk kơna ta hơmâo brơi 12 klai prăk pioh man pơdong, pơkra ming, pơplih phrâo gơnam yua amăng sang hră. Truh mông anai, hơdôm boh sang hră hơmâo prăp lui djŏp laih anih anom, nai pơtô ƀudah hơdră bruă pơtô čơđai, prăp lui giong ƀhiao laih kơ mông jơnum pơphun thun hrăm phrâo.

“Anom bruă pơtô hăng pơjuăt tơring glông hơmâo čih pơkra hơdră ngă bruă kiăo tui tơlơi pơtrun mơng ƀing khua kiăng abih bang khua sang hră thâo bruă pơtô hăng hrăm ăt kah hăng bruă pơgang klin. Hơdôm boh sang hră hơmâo prăp lui hơdră ngă bruă; akŏ pơdong grup pơgang klin kiăng mut thun hrăm phrâo rơnuk rơnua kơ abih bang nai pơtô, mơnuih mă bruă amăng sang hră hăng ƀing čơđai”.

Tơring glông Ea Súp hơmâo brơi rơbêh 12 klai prăk pioh pơkra anih hrăm.

Ơi Phạm Đăng Khoa, Khua gơnong bruă pơtô hăng pơjuăt tơring čar Dak Lăk brơi thâo, kiăng prăp lui kơ thun hrăm phrâo 2021-2022, hơdôm boh sang hră hơmâo lăng glăi abih bang, pơhrua tui gơnam pioh pơtô čơđai, gơnam ngui; pơkra ming hiam anih hrăm, pioh pơkra anih hră, sang pioh hră, sang juă glai, ia mơñum ƀơ̆i hlâo; pơhlôm gơnam yua, gơnam pơtô čơđai klă bơwih brơi hơdră pơtô tui Jơlan hơdră pơtô hrăm phrâo hăng anih 1,2,6; lăng glăi abih bang, dưm dăp mơnuih mă bruă pơhlôm hơmâo djŏp nai pơtô, dưm kơnar mơnuih mă bruă laih anun hơmâo hrăm bruă djơ̆ tơlơi kiăng.

Kiăng pơhlôm bruă pơphun thun hrăm phrâo 2021-2022 tui djơ̆ hrơi pơkă amăng thun hrăm hơmâo Jơnum min mơnuih ƀon sang tơring čar pơtrun, Jơnum min mơnuih ƀon sang tơring čar Dak lăk kiăng Jơnum min mơnuih ƀon sang hơdôm boh tơring glông, plơi prong lăng glăi abih mrô mơnuih glăk dŏ pơčlah pơgang klin ƀơi plơi pla hăng mrô hơdôm anih pơtô hrăm hơmâo mă yua ngă anih brơi mơnuih dŏ pơčlah yua plơi pla anun wai lăng kiăng thâo dưm dăp glăi anih pơčlah, ba glăi sang hră brơi ƀing čơđai nao hrăm. Ơi Phạm Đăng Khoa, Khua gơnong bruă pơtô hăng pơjuăt tơring čar Dak Lăk brơi thâo amăng hrơi klin Covid-19 hơđuh tal 4, Dak Lăk hơmâo 113 boh sang hră hơmâo mă ngă anih pơčlah, djru bruă pơčrang kman, tlâ̆o vaccine. Thun hrăm phrâo giăm truh laih, tơlơi kiăng ječ ră anai lĕ pơhlôm rơnuk rơnua kơ ƀing čơđai hăng ƀing nai lơ̆m klin Covid-19 ăt dŏ kơtang đôč. biă ñu ƀơi hơdôm boh sang hră hlâo kơ anun hơmâo ngă anih bơwih brơi bruă pơgang klin.

“Jơnum min mơnuih ƀon sang tơring čar hơmâo laih hră kiăng hơdôm tơring glông, plơi prong pơdơi bruă mă yua gơnam amăng sang hră pioh pơgang klin, kiăng ƀing nai hơmâo mông kih rơmet, pơkra glăi anih dŏ kơ thun hrăm phrâo. Ƀing gơmơi ăt nao lăng glăi, pơtŏng glăi gơnam hơget kiăng pơkra, blơi phrâo kơ thun hrăm truh anai”.

Hrŏm hăng anun Gơnong bruă pơtô hăng pơjuăt ngă hrŏm hăng Gơnong bruă ia jrao ngă klă bruă kih rơmet, pruih mač tui tơlơi pơkôl, hăng ba glăi tui hơđăp sang hră kiăng nai sang hră prăp lui bruă jơnum mut thun hrăm phrâo, pơhlôm rơnuk rơnua kơ ƀing čơđai, nai pơtô lơ̆m nao pơ sang hră./.

Siu H’Mai: Pơblang