VOV4.Jarai-Hlăk ră anai, anih anom sĭ mơdrô gơnam tam bơwih brơi kơ hrơi ngă yang thun phrâo ƀong tết Nhâm Dần 2022 amăng tơring čar Dak Lak dik dăk laih. Gơnam tam sĭ mơdrô lu mơta, lu djuai, lu gru anăn, boh tŭ yua, wơ̆t hăng pôr sĭ mơdrô rơgêh pơhưč ƀing blơi yua.

Dŏ sa blan đôč truh yơh hrơi ngă yang thun phrâo djuai ania ta juăt lăi ƀong tết, samơ̆ sang anŏ amai Huỳnh Thị Hương, dŏ pơ phường Thành Nhất, plơi prong Ƀuôn Ma Thuôt mơneč (hneč) mă nao pơ hơdôm Siêu thị kiăng ĕp lăng rơnoh sĭ mơdrô hăng ruah mă gơnam kiăng či blơi yua. Tui hăng amai Hương, blơi gơnam kiăng yua ră anai ƀuh rơnoh sĭ mơdrô djơ̆ lăp mơ̆n, anŏ tŭ yua gơnam tam sĭ mơdrô ăt klă soh.

“Ƀuh bơyan čơkă thun phrâo ƀong Tết lĕ djop pô kiăng blơi ia mih, ƀañ, mưt, ƀañ kĕo, tơpai ƀiêr, tơpai djop mơta pioh yua amăng hrơi ngui ngor ngă yang thun phrâo. Ƀuh lu mơta anăn păn gơnam sĭ mơdrô hơbô̆, anăn păn, lu djuai hiam mơ̆n lăng, rơnoh ăt djơ̆ hnong đôč”.

Lu mơnuih ƀôn sang ƀơi plơi prong Ƀuôn Ma Thuôt ƀuh hyu ĕp lăng blơi gơnam yua ƀong Tết yơh

Hyu tơña lăng amăng sang sĭ mơdrô hăng djop anih sĭ mơdrô amăng sang anŏ ƀơi phường Thành Nhất, plơi prong Ƀuôn Ma Thuôt brơi ƀuh, lu mơta gơnam ƀong huă arăng sĭ mơdrô pioh yua amăng hrơi ngă yang thun phrâo ƀong Tết đĭ nua tui. Samơ̆, anŏ kiăng blơi yua amăng sang anŏ mơnuih ƀôn sang aka ƀu lu ôh.

Amai Nguyễn Thị Trúc Phương, pô wai lăng sang sĭ mơdrô Ngọc Khánh 2, phường Thành Nhất, plơi prong Ƀuôn Ma Thuôt brơi thâo, yua bơbeč djơ̆ mơ̆ng klin kheng anun yơh thun anai ƀu khin blơi ba lu mơta gơnam pioh sĭ mơdrô ôh.

“Gơnam blơi glăi sĭ mơdrô thun anai, kơnong blơi mă ƀiă đôč pơkă hăng tơđar thun yua dah klin kheng hrup anai gơnam blơi glăi pioh sĭ mơdrô hŭi ƀiă mơnuih blơi. Rơnoh sĭ mơdrô thun anai ƀuh đĭ tui pơkă hăng rĭm thun, tiy hluai mơta gơnam sĭ mơdrô, hơmâo gơnam đơ đa ngă hơđong nua, hơmâo đơ đa nua pơkă phrâo”.

Phara hăng gơnam sĭ mơdrô amăng sang anŏ hăng amăng sang sĭ mơdrô hơđăp, ƀơi hơdôm siêu thị pơprong kah hăng Go, Co.op Mart, VinMart, MM Mega Markit…, hơdôm mơta gơnam sĭ mơdrô bơwih brơi kơ ngă yang thun phrâo ƀong Tết kah hăng ƀañ kĕo, tơpai, ƀiêr, ia mih, mưt djop mơta. Lu sang sĭ mơdrô siêu thị lêng kơ dăp amăng čơgăn phara, anih hiam hloh ba prưng pơdă gơnam sĭ mơdrô Tết. Rơnoh sĭ mơdrô amăng siêu thị ăt hơđong mơ̆n. Ayong Bùi Văn Quân, khua sang sĭ mơdrô siêu thị Go Ƀuôn Ma Thuôt brơi thâo:

“Hnong gơnam sĭ mơdrô đĭ tui 14% djă pioh pơkă hăng thun 2021, him lăng anŏ kiăng blơi mơ̆ng mơnuih ƀôn sang  aka ƀu lu ôh, sang anŏ sĭ mơdrô kơnong pơđĭ tui rơnoh gơnam  sĭ mơdrô mơ̆ng 5-10% đôč, dŏ glăi truh ră anai arăng aka hyu ĕp blơi ôh.

Nua sĭ mơdrô djă bong kah hăng thun hlâo mơ̆n, tơdah anih sĭ mơdrô pơđĭ trun nua kơnong pơdjơ̆ nao kơ bruă pơdŭ pơgiăng đôč, ƀudah anih pơkra ming gơnam sĭ mơdrô pơkra mă ƀiă đôč či pơđĭ trun nua, samơ̆ truh ră anai djop siêu thị hlăk gir run pơgang hơđong rơnoh sĭ mơdrô kah hăng thun hlâo mơ̆n”.

Djop sang sĭ mơdrô siêu thị pioh lu čơgăn phara pơdă gơnam sĭ mơdrô kơ Tết

Yua kơ klin kheng Covid 19 ngă ăt tơnap tap, hrom hăng prăp lui lu mơta gơnam sĭ mơdrô pioh sĭ mơdrô, anun djop siêu thị ăt pơtrut bruă sĭ mơdrô online, jao gơnam sĭ mơdrô tơl sang, bơwih brơi kơ mơnuih ƀôn sang blơi huăi tơguan nao pơ sang čơ lu mơnuih. Ơi Nguyễn Ngọc Hiệp, Khua wai lăng bruă sĭ mơdrô ƀơi siêu thị MM Mega Markit Ƀuôn Ma Thuôt lăi:

“Ră anai siêu thị gơmơi ăt pơphun lu anih sĭ mơdrô, lu hơdră ba hyu sĭ mơdrô, biă mă ñu sĭ mơdrô online, jao gơnam sĭ mơdrô tơl sang kơ tuai blơi, pơkă hăng thun hlâo hơdră sĭ mơdrô anai năng ai ñu đĭ tui 300% pơkă hăng mrô tuai ăt kah hăng rơnoh sĭ mơdrô”.

Kiăng ngă hơđong nua gơnam sĭ mơdrô rơnuč thun, pơdjop gơnam sĭ mơdrô pioh kơ mơnuih ƀôn sang blơi yua amăng hrơi ngă ngă yang thun phrâo ƀong Tết Nhâm Dần 2022, ră anai hơmâo 10 boh sang bruă sĭ mơdrô pơprong ƀơi Dak Lak ƀuăn pơđôm lui gơnam sĭ mơdrô bơwih brơi kơ bruă sĭ mơdrô thun phrâo abih tih rơnoh prăk 271 klai.

Djop mơta gơnam sĭ mơdrô kah hăng braih, añăm mơnong un, hơbơi pơtơi, boh troh, añăm mơnŭ bip, boh mơnŭ bip, ia rơmă, bột ngọt hăng hơdôm mơta gơnam sĭ mơdrô pơkra ming tơnă hơbai, añăm rơ̆k, hơbơi hơtŭk añăm, gơnam yua pioh hơtŭk riă, ƀañ kĕo, mưt. Hrơi blan ngă hơđong nua sui 2 blan mơ̆ng lơ 15/12/2021-lơ 28/2//2022.

Nam Trang : Pô čih-Nay Jek Pơblang