VOV4.Jarai - Rơbêh 1.800 čô čơđai sang hră gưl 2 ƀơi Dăk Lăk phrâo čih anăn pơplông mut hrăm anih 10, thun hrăm 2021-2022 mơng dua boh sang hră phara hơjăn: Sang hră gưl 3 Chuyên Nguyễn Du hăng Sang hră gưl 3 Dân tộc nội trú Nơ Trang Lơng. Tal pơplông hrăm anih 10 thun anai ƀơi Dăk Lăk kơnong hơmâo 2 boh sang hră đôč pơphun pơplông, anun lĕ Sang hră gưl 3 Chuyên Nguyễn Du, plơi prong Buôn Ma Thuột hăng Sang hră gưl 3 Dân tộc nội trú Nơ Trang Lơng. Amăng mrô 1.839 čô čơđai čih anăn pơplông, 2 boh sang hră ruah mă 550 čô đôč.

Pô sem lăng anăn păn, hră pơ-ar ƀing čơđai nao pơplông.

Rơngiao mơng dua boh sang hră dưi pơplông, thun anai, hơdôm boh sang hră gưl 3 pơkŏn ruah čơđai hrăm ƀơi Dăk Lăk kiăo tui hră pơ-ar hrăm gưl 2. Hơdôm boh sang hră gưl 3, sang hră gưl 3 yua mơnuih ƀon sang pơdong, sang hră gưl 3 Dân tộc Nội trú Tây Nguyên hăng sang hră Thực hành Cao Nguyên, hơmâo hơdră ruah čơđai phara, hluai tui Akŏ bruă ruah čơđai hơmâo Jơnum min mơnuih ƀon sang tơring čar Dăk Lăk kĭ brơi.

Siu H’Mai: Pơblang