VOV4.Jarai-Tơdơi kơ 2 blan jak iâu hơdră anăn “Sóng và máy tính cho em” jua pơhiăp hăng măi komputer kơ adơi, anom bruă pơtô pơjuăt tơring čar Dak Lak hơmâo jak iâu pơčruh 4 klai 500 klăk prăk djru blơi măi komputer, măi telephôn rơgơi kơ čơđai sang hră ƀun rin tơnap tap.Tui hăng Gơnong bruă Pơtô hăng Pơjuăt tơring čar Dak Lak, ƀơi anăp kơ tơlơi tơnap tap hăng hŭi rơhyưt mơ̆ng klin Covid 19 ngă, anom bruă pơtô hrăm pơsit bruă pơtô hăng hrăm mơ̆ng ataih, lăng amăng tivi, măi komputer hăng măi telephôn jing hơdră kiăng hrăm hră hơđong sui hrơi blan dơ̆ng mơ̆n.

Samơ̆ đơ đam tơring čar dŏ 268 rơbâo čô čơđai sang hră ƀu hơmâo tơlơi gêh găl dưi hrăm mơ̆ng ataih djơh hăng anai; amăng anun, čơđai sang hră gưl sa, ƀu hơmâo măi mok hrăm mơ̆ng ataih, lăng amăng tivi ƀudah măi komputer truh kơ 60%.Anom bruă pơtô pơjuăt tơring čar Dak Lak hlăk jak iâu ƀing mơnuih pơdrong, čơmah, pơčruh prăk djru hrom hơdră jua pơhiăp hăng măi komputer kơ adơi, laih dơ̆ng pơđĭ tui boh tŭ yua hơdră anai, anăp nao ngă giong tơhnal pơtrun “Pơdơi nao sang hră samơ̆ ƀu pơdơi hrăm hră ôh”.

Nay Jek: Pơblang