VOV4.Jarai-Mah phrâo mă bruă đôč, samơ̆ hơdră sang ia jrao pơđuăi hyu pơjrao tơlơi duăm ruă tơl plơi pla ƀơi Dak Lak blung hlâo ƀuh ba glăi boh tŭ yua amăng bruă wai lăng pơgang tơlơi suaih pral mơnuih ƀôn sang lơ̆m hơmâo klin Covid 19 ngă tơnap, boh nik ñu amăng anih hlăk dŏ pơčlah mơnuih mơnam pioh pơhlôm, pơgang klin.

Lơ̆m mưn hwing akŏ, pơai buai amăng pran jua, ơi Y Dhôk Êban, dŏ pơ ƀôn Dhă Prong, juăt lăi thôn 7, să Čư̆ Êbur, plơi prong Ƀuôn Ma Thuôt hăt brơi ană đah rơkơi ñu pơgiăng nao pơ sang jơnum plơi, anih arăng ngă sang ia jrao să pơđuăi hyu mă bruă dŏ jưh jăng jai pioh pơkă lăng pơjrao duăm ruă kơ ană plơi pla. Pơ anai, tơdơi kơ pơkă lăng, ơi ia jrao ƀuh ñu hơmâo tơlơi ruă drah nur čơtăng arăt drah 170/90 anun hmao brơi ia jrao mơñum hăng pơtô kơ ñu lăng sŭ tơlơi suaih pral drơi jăn pô pơ sang anŏ.

Ơi Y Dhôk Êban brơi thâo, mơ̆ng hơdôm hrơi hlâo kơ anun, ñu mưn amăng drơi jăn ôr ah, ƀu sŭk dŏ dong ƀong huă ôh, pơai buai, rơgah rơgeñ, samơ̆ yua abih bang amăng plơi arăng guang dar hĭ laih pioh pơgang klin Covid 19 anun ñu aka ƀu dưi nao pơ sang ia jrao pơkă lăng tơlơi duăm ruă. Hmư̆ ană đah rơkơi ñu lăi să  hơmâo akŏ pơjing khul ơi ia jrao mơ̆ng să hyu mă bruă truh pơ plơi pla, anun ñu nao ĕp lăng pioh pơkă brơi tơlơi ruă.

“Kâo ƀuh gêh găl biă mă yua kơ anun kâo rai mơtam brơi pơkă lăng tơlơi duăm ruă, Sang ia jrao să Čư̆ Êbur rai tơl plơi pla djuai ania ƀiă pơ anai kiăng găn rơgao tơlơi hŭi klin kheng ngă truh hrơi anai, kâo ăt rơkâo bơni kơ adơi ayong ƀing ơi ia jrao hur har ngă bruă bơwih brơi bruă pơgang tơlơi duăm ruă kơ mơnuih ƀôn sang pơ anai klă yơh”.

Mơnuih ƀôn sang ƀôn Dhă Prong să Čư̆ Êbur ĕp lăng tơlơi duăm ruă mơnuih ƀôn sang ƀơi sang ia jrao pơđuăi hyu

Sang ia jrao pơđuăi hyu mơ̆ng să Čư̆ Êbur dưi akŏ pơjing lơ 15/9 hơmâo 6 čô mơnuih mă bruă, ơi ia jrao, nai ia jrao. Sang ia jrao pơdong jăng jai ƀơi sang jơnum plơi, sang rung ƀôn Dhă Prong hăng mă bruă hrơi mlam mơtam yơh, hrom hăng bruă pơhlôm, pơgang klin Covid 19 amăng plơi pla; wai lăng, krăo lăng mơnuih ƀă kman Covid 19 pơ sang anŏ; mă ia khak ba pơčrang kman sars-cov-2; tlâ̆o pơgang vaccine Covid 19 laih anun djru pơjrao blung a kơ mơnuih ƀôn sang, kiăng hmao kru hlâo kơ ba nao mơnuih ruă pơ sang ia jrao prong hloh.

Mah phrâo mă bruă đôč, samơ̆ sang ia jrao pơđuăi hyu anun hơmâo pơjrao hmao kru kơ mơnuih duăm ruă đôč đač ƀu djơ̆ klin amăng plơi pla hlăk arăng guang dar hĭ, yua hlâo kơ anun hơmâo phung mơnuih ƀă lu amăng sa anih kman Covid 19 ngă. Ơi ia jrao Y Suôm Êñuôl, Khua sang ia jrao să Čư̆ Êbur pơđuăi hyu brơi thâo:

"Ta bơwih brơi mơnuih ƀôn sang ĕp lăng tơlơi ruă đôč đač, tơdah duăm kraih, ruă kơtang ta brơi nao pơ sang ia jrao prong. Dŏ pơ anai lĕ amăng plơi pla mơtam, gêh găl kơ mơnuih ƀôn sang yua hrơi blan hơmâo klin Covid 19 anai ƀu thâo tơbiă hyu, mơnuih ƀôn sang mơak biă mă laih anun sang jơnum plơi thôn 7 tong krah plơi anun mơnuih ƀôn sang mơak. Mơnuih ƀôn sang nao pơkă lăng tơlơi ruă tơ ƀuh hơmâo tơlơi ruă lĕ ƀơk ia jrao glăi mơñum, ta ăt nao tơl sang mă ia khak pơčrang kman, test hmar rĭm dua klâo hrơi sa wơ̆t”.

Ƀơi plơi prong Ƀuôn Hô, anih hơmâo lu mơnuih ƀă Covid 19 mơ̆n tơring čar Dak Lak, sang ia jrao pơđuăi hyu hlăk gum hrom ƀu anet ôh amăng bruă pơhlôm, pơgang klin hăng pơjrao tơlơi duăm ruă kơ mơnuih ƀôn sang. Sang bruă ia jrao plơi prong hăng 12 boh sang ia jrao să, phường amăng plơi prong akŏ pơjing khul grup ơi ia jrao mă bruă đuăi hyu djop plơi, hơmâo 15 grup, nao tơl sang pel ĕp tơlơi suaih pral, mă ia khak pơčrang kman test hmar brơi kơ mơnuih ƀôn sang kiăng thâo, hlơi ƀă laih, mưn duăm pơ-iă amăng drơi jăn, ruă akŏ ƀlĕ ia mơdung phañ lu, khom pơđuăi brơi pơčlah mơtam ĕp lăng tong ten kiăng thâo ƀă kman Covid 19.

Tui hăng ơi Nguyễn Mạnh Hùng, Khua git gai ping gah, Khua jơnum min mơnuih ƀôn sang phường Đoàn Kết, anih hơmâo čih pioh lu mơnuih ƀă Covid 19 hloh amăng plơi prong Ƀuôn Hô lăi, bruă akŏ pơjing grup ơi ia jrao đuăi hyu djru tơl plơi pla, ngă plai ƀiă tơlơi tơnap kơniă anih pơjrao pơ sang ia jrao prong amăng bruă pơjrao mơnuih duăm ruă, djơ̆ kman klin amăng plơi prong, yua kơ anun ngă kjăp tơlơi đăo kơnang kơ mơnuih ƀôn sang amăng plơi pla.

“Sang ia jrao pơđuăi hyu akŏ pơdong kơnang kơ ƀing ơi ia jrao pơdơi abih thun mă bruă laih, ƀing nai ia jrao thâo hruaih bruă mă amăng tơring glông, plơi prong, mơnuih ƀôn sang ƀiă mơ̆n anun yơh pơdong sa anih đôč, tơdah lu biă mă, ngă tui Hră pơčrâo 16 sui hrơi ƀu anăm ngă bruă ôh lu đơi mơnuih duăm ruă lĕ gơmơi pơmin akŏ pơdong sang ia jrao pơđuăi hyu tal dua dơ̆ng”.

Ƀu kơnong plơi prong Ƀuôn Ma Thuôt hăng Ƀuôn Hô ôh, tơdơi kơ hơmâo tơlơi git gai mơ̆ng Khua dêh čar, Ding jum ia jrao, Gơnong bruă ia jrao tơring čar Dak Lak git gai djop tơring glông, plơi prong, plơi prong phun amăng tơring čar ăt akŏ pơjing khul ngă bruă sang ia jrao pơđuăi hyu amăng djop să, phường, tơring kual  kiăng bơwih brơi bruă ĕp lăng pơjrao duăm ruă kơ ană plơi, ƀu lui tơ̆i đưn hĭ bruă pơjrao duăm ruă kơ ană plơi pla.

Ơi ia jrao Trần Thuận, Khua anom bruă ia jrao tơring glông Krông Ƀŭk, sa boh tơring glông kual ia kơñĭ mriah jing anih hŭi rơhyưt ƀă klin tơring čar brơi thâo: Kiăng akŏ pơjing sa ia jrao pơđuăi hyu, anom bruă ia jrao tơring glông iâu pơtum mơnuih mă bruă ƀơi sang ia jrao să, mơnuih mă bruă ia jrao amăng sang hră hăng ƀing nai ia jrao pơbih thun mă bruă glăi pơdơi laih djru hrom.

Rơngiao kơ anun, blơi prăp lu mơta gơnam yua pơjrao duăm ruă, ia jrao pơhlôm nua, anom bruă ia jrao tơring glông prăp lui djop kơ sang ia jrao pơđuăi hyu, gêt ƀudah đing oxy suă jua ba hyu pioh pơjrao kơ mơnuih duăm ruă ƀă klin Covid 19 amăng sang ia jrao pơđuăi hyu mơtam tơdah hơmâo mơnuih F0 lu đơi.

“Ră anai, hơmâo rơdêh prăp lui yơh pơgiăng mơnuih mă bruă, hrơi anai plơi anai, pơgi nao pơ plơi pơkŏn, tơdah hơmâo kiăng, ƀing ơi ia jrao sang ia jrao pơđuăi hyu khom hyu mă bruă tui hluai tơlơi gêh găl lŏn mơnai glai klô Dap Kơdư, brơi ƀing ơi ia jrao nao tơl sang ĕp lăng hăng pơjrao mơnuih ƀôn sang amăng plơi pla. Tơlơi yôm hloh lĕ ră anai ta khom pơtô lăi mơnuih ƀôn sang thâo hluh dơlăm laih anun khom thâo tong ten tơlơi pơblih amăng mơnuih ƀôn sang”.

Khă phrâo mă bruă đôč ƀơi hơdôm plơi pla anih hơmâo lu mơnuih ƀă Covid 19 ƀơi Dak Lak, samơ̆ sang ia jrao pơđuăi hyu hăng sang ia jrao ha dơnong hai hlăk ngă bruă tŭ yua, glăm ba prong, gơgrong kjăp, ngă djơ̆ bruă pơgang hăng pơjrao tơlơi duăm ruă kơ mơnuih ƀôn sang amăng anih guang dar brơi dŏ pơčlah mơnuih mơnam yua hŭi klin Covid 19 hơđuh ƀă hyu.

Nam Trang-čih: Nay Jek-pơblang