VOV4.Jarai - Ƀơi anăp tơlơi pơplih phrâo mơng klin Covid-19, kiăng pơhlôm kơ ƀing duam ruă, ƀing ơi ia jrao mă bruă pơ sang ia jrao hăng amăng plơi pla, anom bruă ia jrao Dăl Lăk glăk ječ ameč pơgang  klin Covid-19 lar hyu ƀơi anih khăm pơjrao tơlơi ruă.

Ƀơi sang ia jrao prong kual Dap Kơdư, bruă pơhlôm, pơgang klin Covid-19 ăt hơmâo ngă na nao, hơmâo krăp lăng tui Tơlơi pơtrun mrô 3088/QĐ-BYT mơng Ding jum ia jrao pơtrun kơ “Hơnong pơkă Sang ia jrao rơnuk rơnua, pơgang klin Covid-19 hăng klin kheng ngă ruă amăng suă jua”.  Tui anun kiăng dưi ngă hơnong pơkă “Sang ia jrao Rơnuk rơnua”, bruă dăp rơmet, pơgăn anih nao rai, pok jơlan nao rai hơjăn bơwih brơi bruă wai pơgang klin, pơčrang lăng klin duam ruă hơmâo ngă tañ. Abih bang mơnuih nao pơ sang ia jrao lêng pơhaih rơđah, pơkă lăng hyuh amăng drơi jăn. Ƀơi bah amăng sang ia jrao hơmâo rơnap čih boh hră pơtô ba, hăng ƀing pơtuk, duam, ƀlĕ ia dung, ruă đok, ruă tơda, bơbah tơkai tơngan hơmâo nao jơlan phara, hăng hơmâo khăm pơčrang kman Covid-19 ƀơi giăm bah amăng mơtăm yơh, pơhlôm huăi pơgao lui ôh ƀing ƀă kman mut nao pơ sang ia jrao. Pô duam ruă hăng sang anŏ ƀing ñu lơ̆m nao pơ sang ia jrao khŏm kiăo tui glông nao rai mơng sang ia jrao, gôm ƀô̆, ƀu dưi kơčuh khăk ča čot ôh, ƀu dưi dŏ pơƀut lu mơnuih, dŏ pơataih ƀiă hloh 2m .

Pơhaih hlao ƀơi anih mut nao rai mơng Sang ia jrao prong kual Dap Kơdư.

Tui hăng ơi ia jrao Võ Minh Thành, Kơ-iăng khua Sang ia jrao prong kual Dap Kơdư, hăng tơlơi prăp lui klă, jao bruă rơđah rơđông hrŏm hăng prăp lui hơdră pơsir abih bang, hơmâo ia jrao, dram gơnam, pôr pơhing, Sang ia jrao kơjăp bruă pơgang glăi tơlơi truh tơdah hơmâo, pơhlôm rơnuk rơnua kơ mơnuih ruă, ƀing ơi ia jrao, kiăng hơdư̆ ƀiă hloh tơlơi ngă sat mơng klin kheng ngă kơ sang ia jrao.

“Mơng hrơi hơmâo pô blung a ƀă kman amăng hrơi klin hơđuh đĭ tal 4 lĕ sang ia jrao hơmâo hyu sem lăng abih bang, ngă glăi bruă pơgang klin. Hrơi mông anai, abih bang ƀing rai khăm ăt kah hăng pô sang ƀing duam ruă nao pơ sang ia jrao lêng hơmâo lăng kah hăng F0 soh, yua hnun khŏm pơhlôm pơhang klin kơtang hloh, pơhaih brơi ơi ia jrao, pơkă hyuh drơi jăn hăng truă khăn gôm ƀô̆, brơi dŏ pơataih nao rai. Ră anai, gơmơi hơmâo dăp lui lu anih wai lăng mơng hrơi pô ruă nao pơ sang ia jrao, laih anun rim čô mơnuih ruă hơmâo sa čô đôč kiăo tui wai”.

Ƀing ơi ia jrao dŏ gak ƀơi anih mut nao rai pơkă hyuh pơ-iă drơi.

Bơ ƀơi sang ia jrao Lao hăng ruă kơsô̆ - anih glăk pơjrao brơi 3 čô mơnuih ƀă kman Covid-19 ƀơi Dăk Lăk, bruă čơkă mơnuih duam ruă khŏm kiăo tui tơlơi pơtrun pơgang klin Covid-19, mơng bruă čơkă, pơjrao brơi mơnuih ruă. Hăng 3 čô glăk dŏ pơjrao, Sang ia jrao hơmâo kah pơpha 4 ekip dŏ gak pơplih nao rai, rim ekip gak hơmâo 1 čô ơi ia jrao, 2 čô điều dưỡng hăng 1 čô hộ lý. Tui anun, grup dŏ gak amra wai lăng kơjăp mơng mông mơnuih ruă mut nao pơ bah amăng čih črâo brơi jơlan nao rai, brơi dŏ pơčlah. Hrŏm hăng anun, bruă pruih jrao pơdjai kman ƀơi sang ia jrao ăt hơmâo ngă na nao mơn, asuk ruk hơmâo kah jing phara mơn, čuh dor kiăo tui tơlơi pơtrun. Sang ia jrao ăt ngă klă hơdră mă bruă ha bơnah amăng khăm pơjrao tơlơi ruă, tong ten ñu, lơ̆m ƀing ơi ia jrao mut nao pơ sa anih pioh hơjăn či buh sum ao pơgang klin giong anun kah mơng dưi nao khăm brơi pô ruă, tơdơi kơ anun nao pơ anih pơkŏn toh hĭ sum ao pơgang klin, čuh glŏm hĭ tui hăng tơlơi pơtô ba. Ơi ia jrao Châu Đương, Khua sang ia jrao Lao hăng ruă kơsô̆ Dăk Lăk brơi thâo:

“Ră anai sang ia jrao hơmâo pơgăn glông anih pơjrao mơng blung a mơtăm yơh. Abih bang ƀing ruă, pô kiăo tui wai mơnuih ruă lêng hơmâo pơhaih hăng mrô QRcode, pơhaih giong tơdah hơmâo nam ƀă kman lĕ gơmơi khăm lăng ƀơ̆i, giong anun iâu ơi ia jrao nao khăm, tơdah ƀuh nam lĕ gơmơi ba nao pơ anih dŏ pơčlah giong anun mă drah pơčrang kman. Tơdah ƀuh kman lĕ gơmơi ba nao hlao pơ anih pơjrao mơtăm, tơdah huăi ƀuh kman lĕ gơmơi ăt pơjrao brơi suaih duam ƀơ̆i giong anun ba nao dŏ pơčlah đah mơng krăp lăng dong”.

Ơi Nay Phi La, Khua gơnong bruă ia jrao tơring čar Dăk Lăk brơi thâo, kiăng bĕ hĭ hơmâo klin amăng sang ia jrao, Gơnong bruă ia jrao git gai hơdôm boh sang ia jrao pơtŏng glăi tui Mrô pơkă Sang ia jrao rơnuk rơnua pơhlôm pơgang klin Covid-19 hăng tơlơi ruă jơlan suă jua kraih tui Tơlơi pơsit mrô 3088/QĐ-BYT lơ 16/7/2020 mơng Ding jum ia jrao. Hơmâo ngă na nao bruă khăm, kăng glông nao rai, kăng anih pơjrao; pơhlôm wai lăng tơlơi ruă ƀă kman amăng sang ia jrao, khut khăt ƀu brơi ƀă nao rai amăng sang ia jrao ôh. Hơdôm boh sang ia jrao khŏm akŏ pơdong hăng prăp lui hơmâo grup tơhan djru bruă hơdeč hmar, pơtŏp lăng hlâo hăng hơdôm tơlơi truh tơdah hơmâo, prăp lui anih dŏ pơčlah tui tơlơi pơtrun. Ơi Nay Phi La brơi thâo:

“Anom bruă ia jrao hơmâo git gai djŏp anom bruă lĕ khŏm prăp lui hơdră pơsir hăng tơlơi truh ƀu thâo hlâo. Tal sa lĕ hơmâo hơdră brơi pơčlah rim anih pơjrao, ƀudah brơi dŏ pơčlah kiăo tui tơdruai sang, hăng kơtang hloh lĕ abih bang sang ia jrao mơtăm, yua hnun ăt khŏm kiăng hơmâo mơnuih mă bruă, pơhôlm bruă khăm pơjrao tơlơi ruă ăt kah hăng pơgang klin. Ƀơi anai, git gai rim Anom bruă ia jrao tơring glông ăt kah hăng sang ia jrao khŏm prăp lui hơdră pơsir, prăp lui mơnuih mă bruă kah pơpha mă bruă kiăo tui grup, đah huăi bơbeč kơ bruă khăm pơjrao tơlơi ruă, tal dua lĕ prăp lui gơnam yua gah ia jrao ăt kah hăng kăng anih nao rai, anih đih pơjrao hŭi ƀă hyu amăng sang ia jrao”.

Ră anai, Dăk Lăk hơmâo năng ai ñu 80 čô glăk dŏ pơčlah ƀơi sang ia jrao hăng dŏ pơčlah pơƀut ha anih, giăm 1.800 čô mơnuih glăk dŏ pơčlah pơ sang. Bruă hyu ĕp kru, guang dar anih hơmâo klin, brơi dŏ pơčlah hăng pơjrao glăk hơmâo sang ia jrao ngă klă, pơhlôm rơnuk rơnua, tŭ yua. Hăng tơlơi gir mơng abih bang anom bruă ia jrao hăng tơlơi thâo hluh mơng ană plơi pla kiăo tui tơlơi pơtrun pơhlôm pơgang klin, Dăk Lăk amra hrŏm hăng dêh čar tal dưi pơgang klin, pơgang ba tơlơi suaih pral mơnuih ƀon sang.

Nam Trang: Čih - Siu H’Mai: Pơblang