VOV4.Jarai-Lơ 16/8, kông an tơring glông Krông Pač, Dak Lak hơmâo ngă hră pơtrun tơgŭ kơđi tơlơi soh “Ngă ƀă klin hŭi rơhyưt kơ mơnuih” hơmâo amăng blan 8/2021 ƀơi thôn 6 hăng thôn 7 să Vụ Bổn, ngă kơ lu mơnuih ƀă lu amăng dua bit anih hơmâo klin Covid 19 truh rơbêh 20 čô.

Laih arăng ƀuh hơmâo klin, gong gai kơnuk kơna tơring glông Krông Pač brơi guang dar abih să Vụ Bổn truh 4000 boh sang anŏ, năng ai 18 rơbâo čô mơnuih kiăng ngă tui hơdră pơgang hlâo, pruih ia jrao anăm brơi klin lar hyu. Laih dơ̆ng, Jơnum min mơnuih ƀôn sang tơring glông Krông Pač ăt brơi pơdơi bruă jăng jai Khua să Vụ Bổn yua kơ ngă bruă ƀu tong ten pơgang klin.

Bruă tơgŭ kơđi tơlơi soh ƀơi să Vụ Bổn kiăng sem lăng tơlơi soh sat “Ngă ƀă kman klin hŭi rơhyưt kơ mơnuih” hơmâo čih amăng mơta tơlơi 240 Hơdrôm hră tơlơi phiăn bơtơhmal tơlơi soh Bộ Luật hình sự. Yap truh tlam lơ 16/8, tơring čar Dak Lak čih pioh hơmâo truh kơ 527 čô mơnuih ƀă Covid 19, amăng anun 426 čô mơnuih ruă hlăk dŏ pơjrao, 2 čô mơnuih laih djai hăng  99 čô mơnuih pơjrao hlao laih dưi tơbiă mơ̆ng sang ia jrao.

Nay Jek: Pơblang