VOV4.Jarai-Tom brơi, lơ 21/7, Anom bruă tơhan ĕp tơlơi soh mơ̆ng Kông an plơi prong Ƀuôn Ma Thuôt, Dak Lak hơmâo ngă hră tơgŭ kơđi tơlơi soh pô “Ngă pơƀă hyu kman hŭi rơhyưt kơ mơnuih mơnam”. Hlâo kơ anun, lơ 17/7, Khul git gai bruă pơhlôm, pơgang klin Covid 19 tơring čar Dak Lak pôr tơlơi pơhing N.T.H, 36 thun, dŏ pơ plơi thôn 3, să Čư̆ Êbur, plơi prong Ƀuôn Ma Thuôt, mơnuih mă bruă amăng sang bruă rơdêh pơgiăng tuai Tiến Oanh, mrô sang 134 jơlan Hai Bà Trưng, phường Thắng Lợi ƀă laih kman Covid 19.

Sang pô rơdêh Tiến Oanh arăng guang dar hĭ laih H ƀă klin Covid 19

Tui hăng boh tơhnal blung a mơ̆ng anom bruă kơnuk kơna, hlâo kơ anun H hơmâo nao pơ anih hơmâo klin ƀơi ƀôn prong Hồ Chí Minh, truh lơ 10/7 glăi pơ plơi pla pô samơ̆ ƀu ngă tui ôh hơdră pơhlôm pơgang klin, pơhaih bruă ia jrao kiăng dŏ pơčlah djơ̆ tơlơi phiăn, dŏ đuăi hyu lu anih, bưp lu mơnuih. Hrơi mông anun, tơring čar Dak Lak čih pioh hơmâo 13 čô mơnuih ƀă Covid 19 yua pơdjơ̆ nao mơ̆ng Ha soh pơƀă.

Thâo krăn rơđah bruă ngă, tơlơi pơmin anun, anom bruă kơnuk kơna hơmâo tơlơi dưi, djop kơnôl laih pioh tơgŭ kơđi tơlơi soh H pô ngă pơƀă hyu kman truh pơ lu mơnuih mơnam.

Nay Jek: Pơblang