VOV4.Jarai-136 čô mơnuih hlăk dŏ hăng mă bruă ƀơi Tây Ninh glăk pơ Dak Lak laih hăng ba nao pơ anih do pơčlah pơtum tui hơdră pơhlôm pơgang klin Covid 19. Tơdơi kơ glăi truh pơ Dak Lak, abih bang 136 čô mơnuih arăng ba nao pơ anih dŏ pơčlah ƀơi Anih pơtô hrăm tơlơi thâo bruă tơhan, sang hră gưl prong Đại học Tây Nguyên laih anun mă ia khak pơčrang kman covid 19.

Boh tơhnal tal sa abih bang 136 čô anai ƀu hơmâo kman sars-cov-2 ôh. Kiăng huăi ƀă pơrơkua nao rai amăng anih dŏ pơčlah pơtum lu mơnuih, djop pô arăng brơi dŏ phara ba anih tui hluai arăt jrao tlâ̆o pơgang vaccine. Hrơi blan dŏ pơčlah mơ̆ng rĭm mơnuih tui hluai gơñu hơmâo tlâ̆o ia jrao vaccine laih hă aka laih anun boh tơhnal pơčrang kman sars-cov -2.

Truh ră anai, tơring čar Dak Lak aka pok pơhai akŏ bruă nao tŭ mơnuih ƀôn sang glăi pơ plơi pla lu ôh mơ̆ng hơdôm tơring čar Dơnung adih yua hŭi aka ƀu djop anih dŏ pơčlah hăng aka ƀu dưi pơhlôm pơgang klin.

Nay Jek: Pơblang