VOV4.Jarai - Mah bơbeč nao kơtang mơng klin Covid-19 samơ̆ 11 grup hơnong pơkă amăng bơwih ƀong huă-mơnuih mơnam amăng tơring čar Dak Nông lêng kơ dưi hăng rơgao hăng tơlơi pơkă hơmâo ba tơbiă. Tơlơi lăi pơthâo anai hơmâo lăi nao amăng “Jơnum lăng glăi bruă mă thun 2021, jao akŏ bruă, jŭ yap ngăn drăp hăng pok pơhai bruă mă thun 2022”, yua kơ Jơnum min mơnuih ƀon sang tơring čar pơphun amăng tlam lơ 16/12. Tui hăng hră lăi pơthâo mơng Jơnum min mơnuih ƀon sang tơring čar Dak Nông, amăng thun 2021, rơnoh pơđĭ kyar GDP dưm dưm 8,63%, dong tal 7 amăng 63 boh tơring čar, ƀôn prong đơ đam dêh čar; pơhrui rĭm akŏ mơnuih dưm dưm 52 klăk 100 rơbâo prăk/čô/thun.

Mông jơnum

Pơhrui ngăn drăp kơnuk kơna dưm dưm rơbêh 3.100 klai prăk, rơgao hơnong pơkă ba tơbiă. Abih bang rơnoh prăk tuh pơ alin bruă čar thun 2021 amăng tơring čar giăm 2.117 klai prăk, mrô prăk jao tuh pơ alin giăm 98% tui tơlơi pơkă …Kơ akŏ bruă pơđĭ kyar bơwih ƀong huă-mơnuih mơnam thun 2022, Dak Nông him lăng amra tŏ đĭ tui GDP dưm dưm 7,5%; pơhrui ngăn drăp rơbêh 3.000 klai prăk; mrô sang anŏ ƀun rin hrŏ trun rơbêh 3%, kual mơnuih djuai ania ƀiă dŏ 5% pơ glông.

Siu Đoan: Pơblang