VOV4.Jarai - Truh lơ 19/11, tơring čar Dak Nông hơmâo tlâ̆o brơi abih bang laih arăt 1 hăng năng ai 36% arăt 2 pơgang Covid-19 kơ abih bang mơnuih mơng 18 thun truh kơ prong hloh. Anom bruă wai pơgang tơlơi duam ruă tơring čar Dak Nông (CDC Dak Nông) lăi pơthâo, đơ đam tơring čar hơmâo năng ai 445.000 čô mơnuih mơng 18 thun dưi tlâ̆o vaccine pơgang Covid-19. Truh lơ 19/11, Dak Nông hơmâo čơkă mă 708.600 liêu vaccine djŏp mơta kah hăng AstraZeneca, Pfizer, Moderna, Vero Cell mơng Ding jum ia jrao hăng hơmâo tlâ̆o brơi giăm 587.600 liêu, hơmâo tlâ̆o brơi arăt sa kơ 100% mrô mơnuih mơng 18 thun laih, hăng arăt 2 hơmâo 36%.  Rơbêh 120.000 liêu dŏ glăi glăk gir tlâ̆o dơ̆ ƀơi giong dơ̆ anun hlao. Amăng rơwang hrơi tơjuh anai, tơdah hơmâo mă 181.000 liêu vaccine mơng Ding jum ia jrao, him lăng abih blan 11 anai tơring čar amra tlâ̆o vaccine arăt 2 kơ mơnuih mơng 18 thun hơmâo 65%, hăng tlâ̆o djŏp abih bang amăng kơplah wah blan 12.

Siu H’Mai: Pơblang