VOV4.Jarai - Thun hrăm 2021-2022 kiăng djru kơ ƀing čơđai sang anŏ tơnap, anom bruă pơtô hrăm Dak Nông ƀơk hơdrôm hră, hră čih, djru prăk kơ rơbêh 22 rơbâo čô čơđai djŏp anih hrăm. Tui anun, thun hrăm 2021-2022 tơring čar Dak Nông hơmâo 22.400 čô čơđai djuai ƀiă sang anŏ rin, giăm rin dưi mă hơdrôm hră hrăm, hră čih sang hră ƀơk brơi; amăng anun hơmâo 14.300 čô čơđai sang hră gưl sa, rơbêh 6.900 čô čơđai sang hră gưl 2 hăng 1.200 čô čơđai sang hră gưl 3. Tŏng ten hloh, rim čô čơđai amra hơmâo mă djŏp hơdrôm hră hrăm hăng hră čih mơng 14 truh kơ 24 sŏp, tui hluai kơ anih hrăm mơn. Prăk djru čơđai giăm 11 klai prăk, mă mơng prăk kăk amăng tơring čar. Hrŏm hăng anun, Dak Nông ăt jak iâu hơdôm anom bruă, mơnuih mơnam ƀơi tơring čar djru ba prăk kăk, hră čih, sum ao brơi kơ čơđai sang anŏ tơnap tap, drit droai nao hrăm hră.

Siu H’Mai: Pơblang