VOV4.Jarai - Ƀơi anăp kơ tơlơi tơnap mơng klin Covid-19, gơnong bruă ngă hmua tơring čar Dak Nông hơmâo akŏ pơjing khul grup djru, pơlir hơbit djru brơi mơnuih ƀon sang amuñ sĭ gơnam đang hmua. Grup djru, pơlir hơbit blơi gơnam đang hmua gah gơnong bruă ngă hmua hăng pơđĭ kyar ƀon lan tơring čar Dak Nông hơmâo 15 čô ding kơna. Grup amra pô pơhai, gum hrŏm hăng hơdôm tơring glông, plơi prong hmao tlôn pơsir hĭ tơnap, tơlơi gun găn kiăng kơ djru pơtrut bơwih ƀong huă hăng blơi gơnam đang hmua, pơhlôm rơnuk rơnua amăng pơgang klin Covid-19.

Sit biă ñu grup amra jŭ yap glăi, kiăo tui lăng hmao tlôn hơdôm tơlơi gun găn, tơnap tap hăng hơdôm tơlơi rơkâo mơng mơnuih ngă hmua, anom bruă blơi gơnam, pơkra pơjing gơnam đang hmua. Laih dong, pơƀut glăi, pơjing hơdră bruă pơlir kơplah wah mơnuih ngă hmua hăng anom pơkra pơjing gơnam đang hmua, anom bơwih ƀong sĭ mơdrô gơnam pơ tač rơngiao, anom blơi mut gơnam, siêu thị. Ƀơi tơring čar Dak Nông, ră anai boh ƀơr hăng sầu riêng lĕ dua boh troh hơmâo pla lu hloh glăk truh bơyan pĕ pơhrui, samơ̆ yua bơbeč mơng klin anun yơh bruă sĭ mơdrô bưp tơnap tap.

Siu Đoan: Pơblang