VOV4.Jarai - Hăng hơdôm bruă mă tong ten kiăng pơsir hĭ tơnap tap brơi kơ anom bơwih ƀong sĭ mơdrô, tơring čar Dak Nông, glăk gir run pơplih glăi bruă bơwih ƀong sĭ mơdrô kiăng kơ pơhưč tuh pơ alin. Tơring čar Dak Nông phrâo pơphun pok Akŏ bruă pơpjing rơnoh yôm mơng gơnam đang hmua mă yua boh thâo măi mok brơi kơ boh sầu riêng, boh ƀơr hăng boh kruăi hrĕ ƀơi plơi prong Gia Nghiã.

Anai lĕ hơdôm akŏ bruă pơhưč tuh pơ alin blung a hơmâo pơjing tơdơi kơ Jơlan hơdră “Hing ang Dak Nông” yua Jơnum min mơnuih ƀon sang tơring čar  pơphun ƀrô hrơi pơpŭ anom bơwih ƀong sĭ mơdrô Việt Nam amăng blan hlâo anun. Hrŏm hăng bruă pơphun jơlan hơdră pioh pơpŭ ƀing bơwih ƀong sĭ mơdrô hăng pơhưč tuh pơ alin, Jơnum min mơnuih ƀon sang tơring čar Dak Nông hơmâo lăi glăi tơlơi tơña mơng giăm 150 tơlơi pơgôp hiăp mơng hơdôm anom bơwih ƀong sĭ mơdrô. Jơnum min mơnuih ƀon sang tơring čar ăt akŏ pơjing kiăng pơsir hĭ tơnap tap brơi kơ anom bơwih ƀong sĭ mơdrô hăng mơnuih ƀon sang bơbeč nao yua kơ klin Covid-19 ngă.

Siu Đoan: Pơblang