VOV4.Jarai-Mơnuih ƀôn sang pla boh pơ-ô̆ yuan ƀơi tơring glông Dak Mil, Dak Nông dŏ ƀu hơđong dong ƀu mơak pran jua ôh yua hơdôm rơtuh ha đang boh pơ-ô̆ yuan truh bơyan pĕ boh sĭ mơdrô ƀu hơmâo mơnuih blơi. Hăng hơdôm blah đang hơmâo pĕ laih, hơdôm rơtuh tơn boh pơ-ô̆ tuh lui soh sel

Ơi Phạm Công Văn plơi Tân Lập, să Dak Găn, hơmâo 2 ha đang boh pơ-ô̆ djop mơta pioh sĭ mơdrô pơ tač rơngiao. Thun hlâo, mơ̆ng đang boh pơ-ô̆ yua anai, sang anŏ hơmâo prăk pơhrui glăi truh 200 klăk prăk. Bơ thun anai, dơ̆ng mơ̆ng akŏ bơyan truh ră anai, sĭ kơnong hơmâo 100 klăk prăk đôč, djop mă prăk tla kmơ̆k hơbâo pruai samơ̆ prăk kơmlai ƀu hơmâo ôh. Hơdôm dŏ glăi khom nao tuh lui soh sel.

“Rơnoh sĭ ră anai rơgêh biă mă, rơgêh aka ƀu hơmâo djơ̆ ôh dơ̆ng mơ̆ng pơphun ngă bruă pla boh pơ-ô̆. Boh pơ-ô̆ sĭ pơ dêh čar tač rơngiao mơ̆ng 3000 prăk truh 3.500 prăk sa kg. Amăng sang sĭ mơdrô jĕ giăm ba sĭ 500 prăk sa kg, boh pơ-ô̆ klâo bơyan lĕ ƀu hơmâo pô blơi ôh, tuh lui soh.

Sang anŏ hlơi hơmâo boh pơ-ô̆ lu sĭ kơnong 500 prăk sa kg hă ƀu hơmâo kơmlai ôh, ƀu djop prăk apah arăng pĕ boh. Lu sang anŏ lui boh tơsă luh lung soh sel, ră anai nao čre than phun boh pơ-ô̆ mơboh klâo bơyan lĕ arăng pleh lui soh pơ lŏn ngă kơmơ̆k djah djâo”.

Đang boh pơ-ô̆ yua mơ̆ng sang anŏ yă Lê thị Tư ƀu hơmâo pô blơi

Kah hăng anun mơ̆n, sang anŏ yă Lê Thị Tư, hơmâo rơbêh 1,2 hektar đang boh pơ-ô̆ yuan ƀu hơmâo pô blơi ôh, ngă kơ sang anŏ lup kơtang biă mă. Yă Tư brơi thâo, ră anai đang boh pơ-ô̆ yuan gơñu kiah hơmâo sĭ mơdrô ƀiă samơ̆ rơgêh đơi. Sĭ sa tă boh pơ-ô̆ aka ƀu djop mơ̆n prăk apah arăng pĕ. Mah lup leč hai, samơ̆ sang anŏ ăt khom čan prăk pioh pơgang ba đang  boh pơ-ô̆:

“Sang anŏ gơmơi ră anai hơmâo mơ̆ng 5-6 tơn pĕ lui aka ƀu sĭ sa prăk ôh yua ƀu hơmâo mơnuih blơi. Đang boh pơ-ô̆ anai, kâo tuh pơ alin sa thun 70 klăk prăk samơ̆ ăt khom răk rem wai pơgang glăi brơi klă, pruai hơbâo, kmơ̆k, pruih ia jrao pơgang arong aruač hlăt ƀong kiăng phun ñu kjăp. Tơlơi pơhing rơnoh sĭ mơdrô djơh hăng anai laih anun klin kheng dơ̆ng boh pơ-ô̆ sĭ ƀu hơmâo pô blơi, sang anŏ ƀu djop prăk tuh pơ alin dơ̆ng tah”.

Rơbêh 10 tơn boh pơ-ô̆ yuan mơboh klâo bơyan sang anŏ Phạm Công Văn tuh lui soh

Tui hăng jŭ yap mơ̆ng să Dak Găn, ră anai amăng să hơmâo 1000 ha đang boh pơ-ô̆ yuan djop mơta pơjeh. Amăng anun, hơmâo năng ai 70 ha pĕ boh laih, hnong boh lơ̆m sa ha mơ̆ng 15 truh 20 tơn sa bơyan. Ơi Đỗ Viết Hạnh, Kơ-iăng Khua să Dak Găn brơi thâo, yua bơbeč djơ̆ klin kheng Covid 19 ngă, lu pô đang boh pơ-ô̆ phrâo sĭ mơdrô ha mơkrah nua rơgêh đơi, dŏ glăi lui soh sel yua ƀu hơmâo pô blơi hăng nua rơgêh biă mă:

“Kơ hơdră pơsir să hơmâo rơkâo anom bruă pơ dlông, djru ba sang anŏ mơnuih ƀôn sang pla boh pơ-ô̆ yuan, hơmâo hơdră pơkra ming boh pơ-ô̆ djă lui sui, kiăng tuh pơ alin sĭ mơdrô hơđong. Să ăt jak iâu ană plơi gir wai lăng klă đang boh pơ-ô̆ pioh kơ thun pơ anăp dơ̆ng.

Laih dơ̆ng ƀing gơmơi rơkâo djop sang bruă kơnuk kơna, sang bruă prăk hơmâo hơdră pơhrơ̆i hnưh ƀudah kual lui hnưh anăm mă kơmlai ôh jăng jai pioh mơnuih ƀôn sang pla boh pơ-ô̆ yuan rŭ glăi đang hăng plai ƀiă hnong răm rai”.

Tuấn Anh pô čih: Nay Jek pơblang