VOV4.Jarai - Lơ 12/7, tơring čar Dăk Nông hơmâo dong mơnuih ƀă kman SARS-CoV-2 glăi mơng ƀon prong Hò Chí Minh. Pô ruă mrô 31604 lĕ amai C.T.Q tơkeng thun 1966, dŏ ƀơi să Dăk Wer, tơring glông Dăk R’lấp, tơring čar Dăk Nông. Tui hăng tơlơi pel ĕp, năng ai ñu 3 mông mơguah lơ 8/7, amai Q apah rơdêh ia jrao ba rơkơi ñu lĕ P.T.T tơkeng thun 1962 nao pơjrao xạ trị pơ sang ia jrao Bình Dân (371 Điện Biên Phủ, phường 4, kuâ̆n 3, ƀon prong Hồ Chí Minh). Ƀơi sang ia jrao dua rơkơi bơnai ñu hơmâo pơčrang kman hmar laih anun huăi ƀuh kman Covid-19 ôh. Truh 9 mông mơmot hrơi anun mơn, amai Q apah rơdêh ia jrao ba rơkơi ñu glăi (aka ƀu thâo krăn ôh mrô rơdêh hăng pô mơgat rơdêh). Mơguah lơ 9/7, amai Q nao pơ sang ia jrao să Dăk Wer lăi pơhmư̆, laih anun hơmâo pơtô brơi dŏ pơčlah pơ sang. 11 mông 30 mơnit mlăm lơ 11/7, Anom bruă wai lăng tơlơi duam ruă tơring čar Dăk Nông hmư̆ hing amai Q ƀă kman SARS-CoV-2. Amăng mlăm anun mơtăm yơh, ƀing ơi ia jrao tơring čar Dăk Nông ba amai Q nao pơčlah hơjăn, mă ia dung ia khak ba pơčrang, truh 10 mông mơguah lơ 12/7 hăng măi pơčrang RT-PCR pơsit amai Q ƀă klin Covid-19. Tui anun truh tlam lơ 12/7, tơring čar Dăk Nông čih pioh hơmâo 3 čô mơnuih ƀă kman Covid-19 lêng kơ ƀing glăi mơng ƀon prong Hồ Chí Minh.

Ƀing ơi ia jrao ba mơnuih ruă pơ anih dŏ pơčlah

Tơdơi kơ hơmâo na nao mơnuih ƀă kman SARS-CoV-2 glăi mơng ƀon prong Hồ Chí Minh, tơring čar Dăk Nông ngă hră pơtrun ječ ameč pơtô brơi bruă čơkă mơnuih, pơčrang kman 3 wơ̆t hăng ƀing glăi mơng ƀon prong Hồ Chí Minh či pơhlôm pơgang klin Covid-19.

Siu H’Mai: Pơblang