VOV4.Jarai - Tơriñg čar Dak Nông hơmâo pơhrơ̆i hơdră pơčlah mơnuih mơnam ƀơi lu ƀon lan glăk ngă tui tơlơi črâo trun mrô 19, pok glăi abih anih anom bơwih ƀong huă sĭ mơdrô, bơwih brơi tuai. Tui hăng hră pơ-ar hơmâo Jơnum min mơnuih ƀon sang tơring čar Dak Nông pơtrun amăng lơ 23/9, plơi prong Gia Nghĩa hăng 5 boh tơring glông: Tuy Đức, Dak Glong, Dak Song, Krông Nô, Čư̆ Jut, mơng ngă tui tơlơi črâo trun mrô 15 hơdai nao mrô 19. Kơnong tơring glông Dak R’lấp ăt ngă tui tơlơi črâo trun mrô 15 hăng Dak Mil tŏ tui ngă tui tơlơi črâo trun mrô 16. Ƀơi hơdôm ƀon lan hơdai nao ngă tui tơlơi črâo trun mrô 19, Jơnum min mơnuih ƀon sang tơring čar Dak Nông brơi pok glăi hơdôm anih mơñum ƀong, sang jưh tuai; hơdôm bruă sĭ mơdrô hăng pơgiăng hyu tuai nao rai pơ tơring čar pơkŏn hơmâo pok glăi mơn. Laih anun hơdôm anom bruă anai lơ̆m mă bruă glăi, kiăng kơ ngă tui hơdră pơgang klin Covid-19 tui tơlơi pơkă mơng Ding jum ia jrao. Sit biă ñu, anăm brơi pơƀut rơgao 30 čô ƀơi anih mă bruă, sang ia jrao, sang hră. Truh lơ 23/9, tơring čar Dak Nông hơmâo 697 čô mơnuih ƀă klin Covid-19, amăng anun hơmâo 253 čô aka ƀu pơjrao suaih ôh.

Siu Đoan: Pơblang