VOV4.Jarai - Djơ̆ amăng mông jơnum thun hrăm phrâo lơ 5/9 phrâo rơgao, anom apăn bruă Dak Nông hơmâo ƀuh sa čô čơđai ƀă klin Covid-19. Gơnong bruă pơtô hăng pơjuăt brơi pơdơi laih bruă pơtô hrăm ƀơi sang hră. Hơjăn hơdôm boh sang hră Čem rông čơđai djuai ƀiă hơmâo brơi ƀing čơđai dŏ glăi laih anun wai lăng klă. Ƀơi tơring glông Dak R’lấp, hrơi blan rơgao, gong gai hăng anom apăn bruă hơmâo lu bruă djru, pơtrut pơsur ƀing čơđai hăng nai pơtô amăng anih hơmâo klin.

Tơdơi kơ hmư̆ hơmâo sa čô čơđai sang hră ƀă kman SARS-CoV-2 amăng lơ 5/9, rơbêh 220 čô čơđai hăng nai pơtô Sang hră čem rông čơđai djuai ania ƀiă tơring glông Dak R’Lấp, tơring čar Dak Nông brơi abih bang dŏ pơčlah hlao ƀơi sang hră pioh pơgang klin Covid-19. Ơi Nguyễn Văn Nam, Khua sang hră čem rông čơđai djuai ania ƀiă gưl 2 hăng gưl 3 tơring glông Dak R’Lấp brơi thâo, rim hrơi sang hră ngă hrŏm hăng ƀing ơi ia jrao pơkă ayuh drơi jăn, lăi pơthâo glăi tañ tơlơi suaih pral mơng ƀing čơđai hăng nai pơtô.

“Gah bơnah ƀing khua sang hră, mơnuih mă bruă, anih ƀong huă, đih pơdơi hơmâo sang hră prăp lui laih anih ngă bruă hăng anih ngui, bơkơjăp drơi jăn kơ ƀing nai. Hăng ƀing čơđai lĕ hơmâo anih dŏ klă, hơmâo 27 anih dŏ hơmâo apui lơtrik, hơmâo ia yua, sang juă glai, mơnơi hơgơi hơjăn. Bơ bruă ƀong huă lĕ kiăo tui prăk kơnuk kơna djru tui hăng amăng mông aka ƀu hơmâo klin mơn. Gơnang kơ ƀing nai pơtô pơtô pơblang brơi kiăng ƀing čơđai hăng sang anŏ ñu thâo hăng hơđong pran jua. Pơ anai sang hră lo ba djŏp laih, mơng ƀong huă, rơmet rơmot anih dŏ, pơdjai mač, kman, lăng tơlơi suaih pral, tơdah hơmâo tơlơi hơget lĕ sang hră amra ngă hrŏm hăng Sang ia jrao tơring glông lăng ba ƀing čơđai”.

Hơdôm boh sang hră ƀơi Dak Nông pơdơi brơi čơđai nao hrăm.

Tơdơi kơ ƀuh hơmâo čơđai ƀă klin Covid-19, tơring čar Dak Nông brơi pơdơi jăng jai bruă hrăm ƀơi sang hră. Gơnong bruă pơtô hăng pơjuăt tơring čar Dak Nông kiăng abih bang ƀing čơđai hrăm gưl sa, gưl dua, gưl klâo, sang hră pơtô hrăm re se hăng hơdôm boh sang hră pơkŏn ƀơi tơring čar pơdơi hĭ brơi čơđai nao hrăm pơ sang hră mơng lơ 7/9 truh hrơi hơmâo tơlơi lăi glăi phrâo. Hăng sang hră čem rông čơđai djuai ƀiă hơdôm boh tơring glông hăng Sang hră čem rông čơđai djuai ania ƀiă gưl 3 N’Trang Lơng, brơi čơđai dŏ glăi pơ sang hră laih anun wai lăng klă. Hăng sang hră gưl klâo chuyên Nguyễn Chí Thanh brơi ƀing čơđai dŏ glăi pơ sang hră hlâo kơ anun glăi pơ sang anŏ gơñu, laih anun pơtă ƀing čơđai ngă tui klă hơdră pơgang klin.

Gơnong bruă pơtô hăng pơjuăt tơring čar Dak Nông kiăng hơdôm sang hră ngă tui tơlơi pơtrun pơgang klin. Hơdôm boh sang hră tui hluai kơ tơlơi dưi mơn, amra pơphun pơtô hrăm online, brơi hră pơkra tơlơi hrăm, jao tơlơi hrăm kiăng ngă mơ-it amăng plang internet djru čơđai hrăm, hơdor glăi tơlơi hrăm. Anom bruă pơtô hrăm ngă hrŏm tañ hăng sang ia jrao pơtô ba ƀing čơđai, nai pơtô ngă klă bruă pơhlôm, pơgang klin, pơhlôm tơlơi suaih pral kơ abih bang nai pơtô hăng ƀing čơđai dưi găn rơgao hrơi hơmâo klin kheng kơtang anai. Biă ñu hăng čơđai ƀă klin F0, hơmâo lăng ba hloh, pơtrut pơsur pran jua kiăng pô ruă hơđong pran jua, huăi bral, ngă klă bruă pơgang klin covid-19. Ơi Nguyễn Văn Toàn, Khua gơnong bruă pơtô hăng pơjuăt tơring čar Dak Nông čang rơmang ƀing nai pơtô hăng čơđai sang hră hiam drơi jăn na nao, ngă klă hơdră pơgang klin đah mơng dưi pơwơ̆t glăi pơtô hrăm.

 “

“Ră anai gơnong bruă pơtô hrăm hơmâo iâu telephôn tơña bla, juh alum nai pơtô kiăng hơđong pran jua dŏ glăi pơ sang hră yua tơlơi klă hiam kơ pô ta hăng ƀing čơđai sang hră. Ƀing nai pơtô khŏm krăp lăng, iâu telephôn kơ amĭ ama ƀing čơđai lăi pơhmư̆ tơlơi suaih pral kơ ƀing čơđai, laih dong juh alum sang anŏ ƀing čơđai kiăng hơđong pran jua brơi čơđai dŏ glăi. Gơnong bruă ăt git gai sang hră khŏm krăp lăng klă hŭi kơ bơƀă nao rai klin”.

Amăng lan sang Sang hră čem rông čơđai djuai ƀiă tơring glông Dak R’Lấp.

Tơdơi kơ ƀuh hơmâo lu mơnuih ƀă kman SARS-CoV-2 amăng plơi pla mơng sa čô čơđai sang hră ƀơi să Quảng Tín, tơring glông Dak R’lấp, Kơ-iăng khua Jơnum min mơnuih ƀon sang tơring čar Dak Nông yă Tôn Thị Ngọc Hạnh hơmâo ngă hră pơgang klin ječ ameč. Tui anun, tơring čar Dak Nông brơi guang dar, pơgăn abih tơring glông Dak R’Lấp mơng 12 mông lơ 7/9 hăng ngă kiăo tui tơlơi pơčrâo trun mrô 16. Yă Võ Thị Kiều Linh, Kơ-iăng khua jơnum min mơnuih ƀon sang tơring glông Dak R’Lấp lăi, tơdơi kơ tơring čar mă yua tơlơi pơčrâo trun mrô 16, tơring glông hơmâo prăp lui djru laih gơnam ƀong huă kơ ană plơi hluai tui grup pơgang Covid-19. Mơnuih amăng grup amra ba hyu gơnam ƀong huă pơ rim boh sang anŏ, anih dŏ pơčlah mơnuih mơnam amăng anun hơmâo 220 čô nai, čơđai sang hră kiăng abih bang hơđong pran “hlơi dŏ pơpă lĕ dŏ hnong ƀơi anun”.

“Ƀing gơmơi hơmâo git gai Anom git gai pơgang klin să ăt kah hăng tơring glông khŏm pơglôm bu brơi neh met wa kơƀah asơi huă añăm ƀong ôh. Gơmơi mă gơnam ƀong huă pioh pơđom lui, tơdah neh met wa kơƀah lĕ djru ba braih, mi tôm hlâo. Laih dong lăng pơtŏng glăi hơdôm boh sang anŏ rin, rin ƀơ ƀiă, sang anŏ hơmâo anăn kơnuk kơna djru kiăng neh met wa huăi kơƀah asơi huă”.

Khul đah kơmơi tơring glông Dak R’Lấp hơmâo pok pơhai hơbô̆ bruă “Shiper 0 prăk” djru ană plơi nao pơ sang čơ, kiăng ană plơi hơđong pran dŏ pơ sang. Khul đah kơmơi hơmâo akŏ pơdong 110 grup nao pơ čơ, amăng anun hơmâo 700 čô mơnuih mơng hơdôm boh plơi, ƀut plơi djru ba. Rim hrơi grup shiper 0 prăk amra mă hră rơkâo blơi gơnam nao pơ sang čơ blơi gơnam kơ mơnuih ƀon sang. Lơ̆m ba nao gơnam lĕ ƀu bưp ƀơi anăp ôh mơ̆ dưm ƀơi bah amăng sang đah mơng pơhlôm pơgang klin. Hơbô̆ bruă anai amra hơmâo Khul đah kơmơi tơring glông Dak R’Lấp pơphun ngă na nao amăng hrơi dŏ pơčlah abih bang tui tơlơi pơčrâo trun mrô 16.

VOV Tây Nguyên: Čih - Siu H’Mai: Pơblang