VOV4.Jarai - Lơ 28/10, Khul pơ ala mơnuih ƀon sang tơring čar Dak Nông tal IV, rơwang thun 2021-2026 pơphun jơnum sem lăng, pơčrông sai hăng tŭ yap 7 akŏ bruă, tơlơi pơsit yôm phăn amăng pơđĭ kyar bơwih ƀong huă mơnuih mơnam amăng tơring čar.

Amăng mông jơnum, Khul pơ ala mơnuih ƀon sang tơring čar Dak Nông hơmâo sem lăng, pơčrông sai hăng tŭ yap 7 akŏ bruă, črăn tơlơi pơsit, amăng anun hơmâo bơh tơhnal: Tơlơi pơsit pơplih pơkra phrâo hơdră djru amăng pơtô hrăm bruă mă gưl trung cấp, cao đẳng amăng tơring čar rơwang thun 2021-2025; tơlơi pơsit pơhrua dong akŏ bruă mă glăi lŏn, hơdai nao pơplih mă bruă lŏn kiăng pơđĭ kyar bơwih ƀong huă, mơnuih mơnam thun 2021…Sit biă ñu lĕ Tơlơi pơsit pơplih phrâo djop mơta amăng akŏ bruă amăng 3 mơta glai amăng tơring čar Dak Nông, tui anun hơmâo giăm 640 ektar lŏn glai amra ngă brơi hră pơ-ar brơi mơnuih ƀon sang mă yua djơ̆ hăng tơlơi sit nik.

Siu Đoan: Pơblang