VOV4.Jarai - Lơ 20/5, ƀơi pơsat dor tơhan djai pơsăn drơi tơring glông Dak R’lấp (tơring čar Dak Nông), Anom bruă git gai ling tơhan tơring čar, ƀing tơhan hơđăp Trung đoàn mrô 271 hrŏm hăng khua mua pơ ala brơi dua boh tơring glông Dak R’lấp hăng Tuy Đức pơphun mông mơyut jôk hăng ba nao dor 9 per tơlang tơleh tơhan djai pơsăn drơi. Tơdơi kơ 3 hrơi, Anom bruă git gai ling tơhan tơring čar Dak Nông, ƀing tơhan hơđăp hrŏm hăng Anom bruă git gai ling tơhan tơring glông Tuy Đức hơmâo ĕp ƀuh hăng pơƀut glăi 9 per tơlang tơleh tơhan djai pơsăn drơi ƀơi 8 ƀut plơi pla, să Quảng Tân, tơring glông Tuy Đức. Amăng anun 3 boh pơsat dŏ tơlang tơleh, hơdôm pơsat pơkŏn dŏ kơnong gơnam tam đôč anun lĕ get đŏng, tăng, hrĕ pôr pơhing, get bixilin, ƀuông ñôm …

Tơhan hơđăp tŭi ñang pioh hơdor ƀing tơhan djai pơsă drơi

Hơdôm hră pơ-ar dŏ glăi brơi ƀuh ƀing tơhan anai gah Trung đoàn mrô 271 hăng Trung đoàn 205 (Anom bruă git gai ling tơhan kual Ngŏ Dơnung). Anai lĕ tal hyu ĕp, klơi pơƀut glăi tal 4 ƀơi ƀut plơi pla 8, să Quảng Tân hăng hơmâo ĕp ƀuh 29 per tơlang tơleh tơhan djai pơsăn drơi. Amăng mông mơyut jôk, khua mua ƀon lan, ling tơhan hăng mơnuih ƀon sang 2 boh tơring glông Dak R’lấp hăng Tuy Đức hơmâo dưm guang bơnga, tŭi ñang pioh hơdor ƀing tơhan djai pơsăn drơi.

Siu Đoan: Pơblang