VOV4.Jarai - Truh lơ 13/7, tơring čar Dak Nông hơmâo 3 čô mơnuih ƀă klin Covid-19. Ƀơi anăp kơ tơlơi tơnap tap, ƀu hmao thâo mơng klin Covid-19, hăng amra lar hyu lu anih, tơring čar Dak Nông pơphun ngă tui hơdră pơčlah mơnuih mơnam amăng đơ đam tơring čar tui tơlơi črâo trun mrô 15 mơng Khua dêh čar pơphun mơng 12h00 lơ 13/7 truh hrơi hơmâo tơlơi lăi pơthâo phrâo. Tui anun, tơring čar Dak Nông amra brơi pơdơi hơdôm bruă tum pơƀut lu mơnuih mơng 20 čô pơ dlông. Ƀu brơi tum pơƀut mơng 10 pơ dlông rơngiao kơ anom mă bruă, sang hră, sang ia jrao; rơkâo dŏ ataih 2 met lơ̆m tơbiă hyu gah rơngiao. Plai ƀiă đuăi rơdêh amăng jơlan glông, kah hăng đĭ rơdêh pơgiăng tuai amăng tơring čar. Pơsur hrŏ trun mơnuih nao mă bruă pơ anih anom mă bruă, pơsur mă bruă lăng nao rai mơng ataih. Hăng ƀing mơnuih mơng ƀôn prong Hồ Chí Minh (ră anai glăk pơčlah mơnuih mơnam tui tơlơi črâo trun mrô 16/CT-TTg) nao hăng glăi pơ tơring čar: Rơkâo pơčang lăng hăng Realtime PCR ƀơi hơdôm anih pơgang klin, pơčlah pơƀut truh hrơi pơčrang lăng huăi ƀă klin laih anun pơčlah mă pơ sang hăng pơčrang hăng Realtime PCR tui tơlơi pơkă mơng Ding jum ia jrao.

Siu Đoan: Pơblang