VOV4.Jarai-Tơring čar Dak Nông khom brơi dŏ pơčlah abih bang ƀing čơđai sang hră, nai pơtô, mơnuih mă bruă amăng sang hră đôm lăm gưl dua hăng gưl klâo Dak Rlâp, tơring glông Dak Rlâp, lơ̆m ƀuh sa čô čơđai sang hră ƀă Covid 19. Mơguah lơ 5/9, sang hră đôm lăm kơnuk kơna rông gưl dua hăng gưl klâo Dak Rlâp, tơring glông Dak Rlâp, tơring čar Dak Nông tŭ jum čơđai sang hră jơnum mut thun hrăm phrâo.

Giong ĕp lăng pơkă anŏ hlor drơi jăn, ƀuh sa čô čơđai sang hră anih 6 hlor pơ-iă drơi hăng pơtŭk. Giong Test hmar pô anai ƀuh ƀă kman sars-cov-2. Truh tlam lơ 5/9, boh tơhnal ba pơčrang hăng măi PCR pơsit ñu hơmâo kman klin Sars-cov-2 sit nik. Mông anun mơtam, khua sang hră lăi pơthâo anom bruă ia jrao nao pruih ia jrao pơdjai kman, tui kru ƀing jĕ giăm pô ƀă kman.

Laih dơ̆ng, brơi 198 čô čơđai sang hră 7 boh anih hrăm hăng 31 čô nai pơtô, mơnuih mă bruă amăng sang hră khom nao dŏ pơčlah phara hơjăn abih bang.

Nay Jek: Pơblang