VOV4.Jarai - Truh mông anai, tơring čar Dak Nông hơmâo pơđĭ kyar 230 boh anom ngă ƀong hrŏm, hăng rơbêh 18.000 čô ding kơna. Tui hăng tơlơi pơsit mơng Jơnum min mơnuih ƀon sang tơring Dak Nông, hơdôm anom ngă ƀong hrŏm pơplih hơdră ngă bruă tui Tơlơi phiăn anom ngă ƀong hrŏm thun 2012 lêng hơmâo tơlơi pơplih phrâo klă, jai hrơi pok prong hăng đĭ kyar, gum pơplih phrâo ƀô̆ adung mơta amăng plơi pla.

Thun 2021, prăk pơhrui mơng hơdôm anom ngă ƀong hrŏm ƀơi Dak Nông giăm 1 klai 500 klăk prăk, pơsir brơi mă bruă kơ giăm 4000 čô mơnuih, hăng prăk pơhrui hơmâo 70 klăk/sa čô. Biă ñu amăng bruă ngă hmua, hơdôm anom ngă ƀong hrŏm glăk jing anih phun pơtô brơi akŏ pơdong kual ngă hmua prong mă yua boh thâo phrâo mơng tơring čar, pơtruh nao rai ƀing ngă hmua pơkra gơnam tui nua pơkă. Tơring čar hơmâo akŏ pơdong 8 kual ngă hmua mă yua boh thâo phrâo; hơmâo laih 12 mơta gơnam mơng hơdôm anom ngă ƀong hrŏm dưi hơmâo 3, 4 asar pơtŭ amăng jơlan hơdră rim boh să sa mơta gơnam (OCOP), hơmâo ba sĭ kơ hơdôm anih blơi juăt ruah kơtang kah hăng kual Mi Kô̆.

Siu H’Mai: Pơblang