VOV4.Jarai - Tom brơi lơ 7/7, tơring čar Dak Nông hơmâo pơdong 2 anih ƀơi jơlan mrô 14 hăng mrô 28 kiăng kơ pơčrang lăng, phaih gah ia jrao pioh pơgang klin Covid-19. Anih mrô 1 hơmâo pơdong ƀơi jơlan mrô 14 giăm hăng tơring čar Daklak. Anih tal 2 hơmâo pơdong ƀơi jơlan mrô 28 giăm guai tơring čar Lâm Đồng.

Hơdôm anih phrâo pơdong anai amra pel ĕp amăng hơdôm rơdêh mut nao tơring čar Dak Nông, kiăng kơ pơčrang lăng hyuh amăng drơi jăn, phaih gah ia jrao hăng lăi pơthâo hơdôm anih ƀing tuai găn nao hlâo anun. Tơdah ƀuh ƀing mơnuih him lăng ƀă klin ƀudah glăi mơng kual hơmâo klin amra ba nao pơ anih pơčlah laih dong lăi pơthâo mơtăm brơi kơ Khul git gai amăng pơgang klin Covid-19 tơring čar kiăng kơ hơmâo hơdră pơsir hĭ hmao tlôn.

Siu Đoan: Pơblang