VOV4.Jarai - Tơlơi pơhing mơng Kông ang tơring glông Krông Pač, tơring car Daklak, Ƀirô pel ĕp kơđi tơlơi Kông ang tơring glông glăk pơphun pel ĕp ngă rơđah bôh than ba truh pơnăng sang pơkra geč tơglưh trun ƀơi să Ea Yiêng ngă 3 čô čơđai rơka ruă djai brŭ dưi pơsit lĕ Gia Nhi 8 blan, dua čô rơka ruă kraih lĕ Du Mi, 7 thun hăng Du Hi, 5 thun, wot 3 čô čơđai dô̆ ƀơi să Ea Yiêng, tơring glông Krông Pač, tơring čar Daklak. Sa čô mơnuih amăng sang anô̆ ƀing čơđai anun brơi thâo, tơlơi truh lom 3 mông 30 mơnit čơtlăm lơ 18/5, lom 3 čô čơđai anai tơbiă ƀơi kual kơhul geč mơng sang anô̆ ngui hăng ƀu bưng pơnăng geč tơglưh trun. Lom tơglưh trun, lu mơnuih glăk mă bruă amăng anih kơhul geč. Lăng ƀuh ƀing čơđai anai djop mơnuih tañ ba ƀing pơ̆ Sang ia jrao prong kual Dăp Kơdư pơjrao ječ, samơ̆ yua kơ nam rơka kơtang đơi Gia Nhi djai hĭ; dua cô dô̆ glăi Mi hăng Hi dưi pơtlaih brơi hăng glăk dưi pơjrao ƀơi Sang ia jrao. Kông ang tơring glông Krông Pač hmâo nao guang dar laih anih anom anun, pơphun pel ĕp lăng, ngă rơđah bôh than ba truh tơlơi anai./.

Siu H’ Prăk: Pô pơblang