VOV4.Jarai - Ngă tui tơlơi črâo ba mơng Grŭp apui lơtrik Việt Nam (EVN), amăng dua blan 7 – 8/2021, Sang bruă apui lơtrik tơring čar Daklak ngă tui bruă hrŏ trun prăk apui kơ giăm truh 150 rơbâo čô mơnuih ƀơi tơring glông Čư̆ Kuiñ hăng plơi prong Buôn Ma Thuột, hơdôm anih anom khom ngă tui dô̆ čơlah mơnuih mơnam tui tơlơi Crâo ba 16 mơng Kơnuk kơna kiăng pơgang, pơgăn klin Covid-19.

Amăng tal 4, Sang bruă apui lơtrik Daklak, ngă tui bruă djru rơbêh kơ 12 klai 500 klăk prăk pioh hrŏ trun prăk apui kơ mơnuih yua apui lơtrik. Kiăo tui anun rơnoh rơđah ñu lĕ: Hrŏ trun 15% mrô prăk apui amăng hră pơkă nua apui kơ mơnuih yua apui mă yua truh 200 kWh sa blan; hrŏ trun 10% prăk apui amăng hră pơkă nua apui kơ mơnuih mă yua apui rơbêh kơ 200 kWh sa blan. Ơi Hà Văn Chương – Kơ-iăng Khua Sang bruă apui lơtrik Daklak brơi thâo, ngă tui dô̆ čơlah mơnuih mơnam pơgang, pơgăn klin Covid-19 tui Tơlơi črâo ba 16 mơng Khua dêh čar, djop mơnuih leng kơ khom dô̆ amăng sang anun tơlơi mă yua apui đĭ lu. Bruă hrŏ trun prăk apui kơ mơnuih yua apui lĕ tơlơi kiăng biă amăng tơlơi klin ruă ngă. Anom glăk gum hrom tañ hăng ƀirô apăn bruă čih anăn mơnuih kiăng djru hrŏ trun prăk apui tui tơlơi pơkă./.

Siu H’ Prăk: Pô pơblang