VOV4.Jarai- Lơ 23/5, mơnuih ƀon sang đơ đam dêh čar ta nao jơnum pơƀut kơ bruă kơđi čar yôm phiăn - Hrơi ruah Khua pơ ala mơnuih ƀon sang dêh čar tal XV hăng khua khul pơ ala mơnuih ƀon sang djop gưl rơwang thun 2021-2026. Hrŏm hăng đơ đam dêh čar, djop anom bruă tơring čar Daklak glăk gir run pơgiong abih bruă dŏ glăi, prap lui djop mơta kiăng kơ hrơi plĕ hră amra pơphun rơnuk rơnua, pơhlôm djơ̆ tơlơi phiăn, ngă pô hăng jing hrơi jơnum tum pơƀut brơi kơ abih bang mơnuih ƀon sang.

Anai lĕ sa amăng hơdôm anih akŏ phun amăng plơi prong Buôn Ma Thuột, phường Thành Công hơmâo 13 anih pơphun plĕ hră hăng rơbêh 5.000 čô mơnuih amra nao plĕ hră. Anih pơphun plĕ hră, tĕp hră čih anăn ƀing mơnuih ƀon sang hăng ƀing tơbiă anăn ruah ngă khua, hơmâo grup pơphun plĕ hră dưm dăp lăp djơ̆, hơƀot, prap lui giong abih laih kơ hrơi plĕ hră. Kiăng pơhlôm rơnuk rơnua, Khul git gai pơphun plĕ hră phường Thành Công ăt pơpha tơhan hyu tir kiăng kơ wai lăng kjăp, tañ ĕp ƀuh tơdah hơmâo tơlơi amuñ ngă rung răng, pơsir hĭ hơdôm bruă aka ƀu klă (tơdah hơmâo). Ơi Phan Hữu Trí, Khua apăn bruă Ping gah, Khua khul pơ ala mơnuih ƀon sang, Khua khul git gai plĕ hră phường Thành Công, plơi prong Buôn Ma Thuột, tơring čar Daklak brơi thâo:

Bing gơmơi git gai Jơnum min plĕ hră kiăng kơ pơphun na nao bruă pel ĕp bruă bơdjơ̆ nao hrơi plĕ hră ruah khua mua. Dua lĕ, jŭ yap djop ƀing mơnuih nao plĕ hră. Laih dong pơhlôm djop mrô anăn ƀing tơbiă anăn ruah ngă khua, tơdơi kơ hră čih anăn ƀing tơbiă anăn lăi pơthâo, ƀing gơmơi amra pơpha tơhan tơhrơi kah hăng mlăm anun lĕ tơhan kông ang, tơhan wai lăng plơi pla, tơhan hyu tir amăng plơi pla jao bruă brơi ƀing gơñu dŏ gak, wai lăng hơdôm anih pơphun plĕ hră. Truh ră anai hră čih anăn hơmâo ƀing gơmơi pơhlôm brơi djop yơh.

Hră čih anăn ƀing tơbiă anăn ruah Khua pơ ala mơnuih ƀon sang dêh čar tal XV hăng khua khul pơ ala mơnuih ƀon sang djop gưl, rơwang thun 2021-2026, hơmâo tĕp ƀơi Jơnum min mơnuih ƀon sang phường Thành Công, Buôn Ma Thuột, Daklak

Ƀơi plơi prong, Khul git gai plĕ hră, Jơnum min plĕ hră hăng Jơnum min djop djuai ania mơnuih mơnam Việt Nam plơi prong Buôn Ma Thuột, hơmâo akŏ pơjing grup hyu pel ĕp, krăo lăng bruă pơphun plĕ hră ƀơi djop să, phường, pơhlôm djơ̆ hăng tơlơi pơkă, bruă mă kiăng ngă djơ̆ hrơi mông hăng djơ̆ tơlơi phiăn. Ơi Nguyễn Khắc Long, Kơ-iăng khua Khul pơphun plĕ hră plơi prong brơi thâo, truh ră anai, lu mơnuih ƀon sang hơmâo laih thẻ cử tri hăng thâo rơđah mrô mơnuih tơbiă anăn, mrô Khua pơ ala mơnuih ƀon sang dêh čar tal XV hăng khua khul pơ ala mơnuih ƀon sang djop gưl rơwang thun 2021-2026; hră čih anăn ƀing mơnuih tơbiă anăn hơmâo mơ-it nao tơl rĭm boh sang anŏ, kiăng kơ sem lăng amra ruah pô hlơi lăp djơ̆ hloh. Hăng ƀing cơđai sang hră lơ̆m pơwŏt glăi pơ plơi pla amra pơhrua dong anăn mơnuih nao plĕ hră kiăng pơhlôm brơi tơlơi dưi mơng ƀing gơñu.

Anăn ƀing mơnuih truh thun nao plĕ hră ƀing gơmơi amra pel ĕp glăi hăng jŭ yap glăi truh abih lơ 21/5. Yua ră anai klin Covid-19 sa, dua boh sang hră gưl prong brơi čơđai pơdơi hrăm lăng nao rai amăng măi telephôn, ƀing čơđai hrăm hră amra pơwŏt glăi pơ plơi pla yua anun kiăng kơ jŭ yap glăi, ƀudah ƀing čơđai sang hră gưl prong Tây Nguyên brơi ƀing čơđai pơdơi glăi pơ plơi pla kiăng kơ tŏ tui pel ĕp čih anăn ƀing mơnuih amra nao plĕ hră hmao tlôn hăng kơ phrua brơi lăp djơ̆.

Mơnuih ƀon sang Daklak đing nao biă mă ƀing tơbiă anăn ruah ngă Khua pơ ala mơnuih ƀon sang dêh čar tal XV hăng khua khul pơ ala mơnuih ƀon sang djop gưl rơwang thun 2021-2026

Tui hăng ơi Y Biêr Niê, Kơ-iăng khua git gai Ping gah tơring čar, Khua Khul pơ ala mơnuih ƀon sang tơring čar, Khua khul khua mua pơ ala mơnuih ƀon sang tơring čar, Khua jơnum min plĕ hră ruah khua tơring čar Daklak, đơ đam tơring čar hơmâo 1.794 grup pơphun plĕ hră hăng 1.802 anih plĕ hră. Djop mơta bruă prap lui hrơi plĕ hră ƀơi Daklak giong abih laih, djơ̆ hăng tơlơi rơkâo mơng Khul pơphun plĕ hră ruah khua dêh čar ba tơbiă. Sit biă ñu, ƀơi anăp kơ bruă ngă tơnap tap mơng klin kman hăng bruă pơhlôm rơnuk rơnua ƀơi ƀon lan, grup pơgang rơnuk rơnua hăng bruă ia jrao hơmâo ba tơbiă hơdră pơhlôm rơnuk rơnua mơnuih mơnam amăng tơring čar amăng hrơi mông pơphun plĕ hră ruah khua. Kông ang hơmâo pok pơhai lu wŏt hyu tir pơgăn hơdôm bruă ngă soh, đing nao pel ĕp, pơsir hĭ hơdôm kơđi ngă lu mơnuih bơngŏt. Gơnong bruă ia jrao amra prap lui hơdră bruă ječ amăng hrơi plĕ hră amăng hrơi blan klin Covid-19 glăk tơnap tap… Ơi Y Biêr Niê brơi thâo:

Dưi lăi pơtong ră anai bruă prap lui hrơi plĕ hră ruah khua ƀơi tơring čar Daklak prap lui djơ̆ hrơi mông hăng djop bruă lêng kơ ngă djơ̆ tơlơi pơkă ba tơbiă lăp djơ̆ hăng hrơi blan hơmâo klin kman ră anai pơhlôm gah bruă ia jrao lĕ kiăng đing nao biă mă. Čang rơmang mơng anai truh hrơi plĕ hră djop mơta bruă amra pơphun hiam klă kiăng ngă hiưm pă ƀing ta amra pơphun hrơi plĕ hră amăng tơring čar Daklak rơnuk rơnua pơgôp ngă pơgiong hiam klă tal plĕ hră amăng đơ đam dêh čar ta.

Hrơi plĕ hră jê̆ giăm laih. Hrơi anai, lơ 22/5, 7 puih tơhan wai pơgang guai hăng anom bruă pơtô hrăm tơhan blah hơdeč, gah anom bruă wai pơgang guai tơring čar Daklak pơphun tañ ƀiă pơhmu hăng hrơi pơkă kơ tal plĕ hră ruah Khua pơ ala mơnuih ƀon sang dêh čar tal XV hăng khua khul pơ ala mơnuih ƀon sang djop gưl rơwang thun 2021-2026.

Hăng tơlơi gir run mơng djop anom bruă mơng tơring čar truh pơ ƀon lan hrŏm hăng tơlơi čang rơmang, gir kơtir abih pran jua mơng mơnuih ƀon sang, tal plĕ hră ruah Khua pơ ala mơnuih ƀon sang dêh čar tal XV hăng khua khul pơ ala mơnuih ƀon sang djop gưl rơwang thun 2021-2026 tơring čar Daklak glăk anăp nao tơlơi truh kih, rơnuk rơnua, tŭ yua, jing hrơi jơnum tum pơƀut abih bang mơnuih ƀon sang.

Siu Đoan: Pơblang